د صنعت اوونۍ په مناسبت پرانيستل شوی شپږ ورځنی نندارتون پای ته ورسېد. د تنظيموونکو د مالوماتو له مخې، له دې نندارتون د ۵ زره بهرنيو سيلانيانو په ګډون، شاوخوا ۵۰۰ زرو تنو لیدنه کړې او دا د صنعت سکټور لپاره د پام وړ لاسته راوړنه ګڼل کېږي.
دوی دغه راز د نندارتونو پرمهال د شرکتونو ترمنځ د ۷ ميليونو ډالرو په ارزښت د قراردادونو او ميليونونه ډالرو پر ارزښت د توکو پلورلو خبر هم ورکوي.
د کانونو او صنایعو خونې رییس شېر باز کمین زاده وايي: « دلته تقریبا ً د ۷ میلیونو ډالرو په ارزښت تړونونه وشول او هرې غرفې کافي اندازه فروشات هم لرل او ښايي تر یو میلیون ډالرو ارزښت ولري.»
د صنعت اوونۍ څلورم نندارتون د لومړي ځل لپاره د ښځينه متشبثو له حضور پرته ترسره شو، هغه څه چې د کانونو او صنایعو خونه يې لامل د اضافي غرفو لپاره د ځای نه شتوالی يادوي.
چارواکي بيا د صنعت د ودې او د صنعتکارانو د ملاتړ ډاډ ورکوي او په خبره یې، نور بهر مېشتي افغان پانګوال دې هم په افغانستان کې دننه پانګونه وکړي.
د کار او ټولنیزو چارو وزارت معين زاهدالله احمدزی وايي: « همدارنګه د افغانستان اسلامي امارت له لوري پانګوالو ته فرصتونه او سهولتونه برابر شوي، ستونزې ی اورېدل شوې او د هواري په موخه یې ځینې ګامونه هم پورته شوي دي. موږ په دې باور یو چې په دې تړاو به نور لازم ګامونه هم پورته شي.»
د کانونو او صنایعو خونې رییس شېر باز کمین زاده وايي: « د دې دلیل دا و چې زموږ خویندې معمولا ً د لاسي صنایعو په برخه کې کار کوي، خو له بده بخته په نندارتون کې مو کافي ځای نه درلود. موږ چې کله د دې لپاره اعلانات وکړل، ټول داخلي شرکتونه راغلل او غرفې یې ونیولې.»
صنعتکاران که څه هم د نندارتون له پايلو خوښ دي، خو له سرپرست حکومت غواړي چې په نړيوالو مارکېټونو کې يې توکو ته د بازار موندنې له لارې ملاتړ وکړي.
صنعتکار نېک محمد وايي: « زموږ غوښتنه دا ده چې دغه شان نندارتونونه په بېلابېلو ولایتونو کې جوړ شي او دغه راز دې په سرحدي سیمو او بندرونو کې له ګاونډیانو سره ګډ بازارونه جوړ شي؛ ترڅو د هېواد ترڅنګ، هلته هم دغه داخلي تولیدات وپلورل شي.»
صنعتکار صبور کړوخېل وايي: « له هېوادوالو تمه لرو چې د خپل وطن له تولیداتو او محصولاتو ګټه واخلي، ترڅو پانګوال او پانګوالي نوره هم پرمختګ وکړي.»
په دې نندارتون کې د بېلابېلو سکټورونو کورني توليدات او محصولات لکه خوراکي توکي، لاسي صنايع، غالۍ، برېښنايي وسايل، ساختماني مواد او د کور لوازم نندارې ته وړاندې شوي وو.
له دې مخکې چارواکو له سوداګرو او پانګوالو غوښتي و چې په افغانستان کې له پانګونې سره د هېواد پرځان بسیاينې کې ونډه واخلي.
