Skip to content
د بایډن د پرېکړې په اړه د غبرګونونو په دوام نن پنجشنبه د «۱۴۰۰ کال د سلواغې پر ۲۸ مه» صنایعو او پانګونې خونې د یوه خبري کنفرانس پر مهال د یادې شتمنۍ د ازادولو غوښتنه وکړه.
د یادې خونې سرپرست سخي احمد پیمان د بندو پيسو د ازادولو غوښتنه وکړه او کنګل شوې شتمني يې د افغانانو وبلله.
پیمان د امریکا متاحده ایالتو ولسمشر جو بایډن له هغه فرمان سره مخالفت وکړ،چې ګنې د افغانانو د پانګې نیمه برخه دې د سپټمبر ۱۱ پېښې قربانیانو ته ورکړل شي.
پيمان زیاته کړه:«د بايډن وروستۍ پرېکړه،چې د افغانستان پيسې دې د سپټمبر پېښې قربانیانو ته ورکړل شي،دا د افغانستان د غریبو خلکو حق کې غیرې عادلانه پرېکړه ده، غیرې قانوني ده او دا پر يو ملت ظلم دی. د افغانستان د صنایعو او کانونو خونه دغه پرېکړه په بشپړ ډول رد کوي.»
د يادې خونې د نړيوالو اړیکو مرستیال فرید احمد مولوي زاده بیا وايي، کنګل شوې شتمۍ د سوداګرو پر وړاندې ستونزې پيدا کړي او که پانګه ازاده شي، دغه ستونزې به ژر حل شي.
مولوي زاده زیاته کړه:« موږ نن ورځ د افغانستان په بانکونو کې پیسې لرو. زموږ په کارخانو کې خام مواد خلاص شوي دي، خام مواد نه لرو، خو پیسې نشو کولای،چې ټي ټي کړو خارج ته. واقعاؤچې دغه يوه لویه فاجعه ده.»
د کنفرانس ځينې ويناوالو له ملګرو ملتونو او په ځانګړي ډول اسلامي هېوادونو غږ وکړ،چې د بایډن د پریکړې مخالفت وکړي او د افغانستان شتمني افغانانو ته وسپاري.
د صنایعو او کانونو خونې مرستیال حاجي ظریف ګل وايي:« اسلامي هېوادونه په دې برخه کې دومره لوی رول لري،که چېرته نن هغوی په يو شکل دغه غږ پورته کړ،د افغانانو سرمایه څه چې د ټولې پانګه نه شي خوړلی، دا خو يو مملکت دی، مسلمانان باید په دې کې سره یو شي،ما مخکې هم په خبرو کې وویل،زموږ چې څومره ګاونډي هېوادونه دي،دا ټول مسلمانان دي او دا ټول باید په کار شي، په دې خاطر که چېرته افغانستان کې بې ثباتي راغله، نو ټول ګاونډيان او نړۍ له دې افغانانو څخه بې ثباته کېدای شي، نو په کار دا ده،چې ټوله اسلامي نړۍ دې برخه کې يو غږ پورته کړي.»
دافغانستان بانک له ۹،۶ میلیارډه ډالره کنګل شویو پیسو چې اووه میلیارده ډالر یې په امریکا کې دي، ولسمشر جو بایډن یې د نیمايي برخې په اړه یو اجرایوي فرمان ورکړی، چې له مخې یې د سپټمبر یوولسمې پيښې د قربانیانو وارثینو ته ورکړي،چې دغې پرېکړې یې په کور دننه او بهر توند غبرګونونه پارولي دي.
خبریال: یارمحمد پردېس
