له شمالي ولایتونو یو شمېر ځوانان د نورو په استازولۍ سوېل ختیځو ولایتونو ته په سفر تللي دي.
د دې سفر موخه د هېوادوالو ترمنځ یووالی ښودل شوی.
په دې ځوانانو کې د بلخ، سمنګانو، جوزجان، فاریاب او سرپل ولایتونو استازي شامل دي.
د پکتیا ځایي چارواکي وایي، ځوانان د هېواد مهم او بنسټیز قوت دی او د دې ډول مناسباتو له لارې کولی شي هغه منفي ذهنیتونه له منځه یوسي چې د تفرقې د خپرېدو لامل شوي دي.
د پکتیا د اطلاعاتو او فرهنګ ریاست د ځوانانو چارو آمر سیف الرحمن وهاج وايي: « که چېرې دا ځوانان سره یو شي، موږ کولی شو د هېواد ۷۳ سلنه ځوان نسل همداسې ځوان وساتو، خو که خدای مه کړه دغه ځوانان په بده لاره روان شول او تفرقې ته یې مخه کړه، ناشونې ده چې یو واحد هېواد ولرو.»
د پکتیا د علماوو شورا رییس شیخ صالح محمد فقیر وايي: « افغانان یو ملت دی او یو کور لري. اغیارو موږ ته مختلف رنګونه راکړي، په چا یې یو او په چا بل نوم اېښی او په خپلو کې یې ۴۰ کاله سره وجنګولو.»
پکتیا ته ورغلي ځوانان وايي، په دې سفر کې يې د دې سیمې په اړه هغه مالومات منظم او سم کړل چې پخوا يې د دې سیمې په اړه ناسم اورېدلي وو.
د دوی په خبره، ورته سفرونه به د بېلابېلو ولایتونو د خلکو ترمنځ د هر اړخیزو اړیکو په پیاوړتیا کې مهم رول ادا کړي.
د بلخ اوسېدونکی اکبر پاچا وايي: « واقعا ً دغسې تګ راتګ نه یوازې د ځوانانو بلکې د ولس لپاره هغه واټن له منځه وړي چې کلونه پخوا رامنځته شوي دي. ځوانان په دې تګ راتګ کې خپلې مفکورې او احساسات شریکوي.»
د بلخ اوسېدونکی علي انصاري وايي: « د دې سیمې خلکو په خلاصه غېږه له موږ هرکلی او مېلمه پالنه وکړه، دا هغه څه وو چې موږ په تېرو ۲۰ کالو کې نه وو لیدلي. زه د بلخ ولایت د یوه استازي په توګه فکر کوم چې زموږ د شمالي، جنوبي او جنوب شرقي ولایتونو د خلکو ترمنځ ډېر مشترکات شته دي. موږ باید دا مشترکات پیدا کړو، ترڅو زموږ له ملي پیوستون سره مرسته وکړي.»
تر دې وړاندې د شمال زون د علماوو او مشرانو یوې ډلې سوېل ختیځو ولایتونو پکتیا، پکتیکا، خوست او لوګر ته سفر کړی و او همدا راز د جنوب ختیځو سیمو مشران هم شمال ته تللي وو.
د مسوولینو په خبره، دا لړۍ به د ملي یووالي د لا پیاوړتیا په موخه ادامه ولري.
