د شمالي وزيرستان په ميرعلي کې قومي مشر حاجي شېر محمد د سه شنبې ورځ په مازیګر د نامالومو وسلهوالو له لوري د پاکستاني پوځيانو پوستې ته څېرمه په ډزو وژل شوی دی.
نوموړی د شمالي وزيرستان د اتمانزو قومي مشر او د مبارز شخصيت حاجي ميرزا علي خان، چې خلکو د ايپي فقير لقب ورکړی لمسی دی.
حاجي شېرمحمد د قومي مشرۍ په دوران کې پر خپل قوم سربېره په شمالي او سوېلي وزيرستان کې د ټولو قومونو د يووالي لپاره مبارزه کړې او له وروستيو دوو کلونو راهيسې یې د پاکستان د حکومت هغې پرېکړې پر وړاندې ولاړ وه، چې په وزيرستان کې يې د کانونو د استخراج په موخه کړې.
د وزيرستان قومي مشران وايي، حاجي شېرمحمد د وزيرستان په کانونو کې د ځايي خلکو د حق غوښتونکی وه او اجازه يې نه ورکوله، چې د پاکستان حکومت ځايي خلکو ته له حق ورکولو پرته خپلسرې کان کېدنې وکړي.
د پښتون ژغورنې غورځنګ غړي بيا د حاجي شېرمحمد د ترور پېښه دسيسه بولي او وايي، په قبايلي سيمو کې مخکښ قومي مشران په دې موخه په نښه کېږي، څو قومي يووالی زيانمن او خلک له قومي پلوه کمزوري شي.
دوی نيوکه کوي،چې د هدفي وژنو له ورته پېښو وروسته، بريدګر په سړه سينه له سيمې وځي او د پاکستان امنيتي ځواکونه يې د نيولو هڅه نه کوي.
د پښتون ژغورنې غورځنګ غړی علم زېب مسعود وايي:« دلته يو فيلډر موټر راځي او زموږ درې تنه په نښه کوي، چې دوه يې وژل کېږي او يو ټپي کېږي. دا هغه مرمۍ دي، چې موږ د پېښې له ځایه ترلاسه کړي دي، خو له دې اندازه ولګوئ، دلته د پوځ پوسته او هغه ملکي روغتون دی. بيا هم بريدګر روغ سلامت له سيمې وتلي دي.»
د حاجي شېرمحمد د ترور پېښې د افغانستان پخواني ولسمشر حامد کرزي او نورو مطرحو څېرو غبرګونونه هم پارولي دي.
حامد کرزي پر خپل ټوېټر پاڼه کې د حاجي شېرمحمد وژل کېدل په قومي کچه لويه ضايع بللې ده.
کرزي زیاته کړې:« په ډېرې خواشینۍ سره مې خبر ترلاسه کړ،چې قومي مشر او مخور حاجي شېر محمد وزیر د شمالي وزیرستان په ميرعلي سیمه کې د وسلهوالو له خوا په شهادت رسېدلی دی. د حاجي شیر محمد وزیر مړینه لویه ضایعه ده.»
په شمالي او سويلي وزيرستان کې د قومي مشرانو د ترور دا لومړۍ پېښه نه ده. له دې وړاندې پر يادو سيمو سربېره په ډېری قبايلي سيمو کې هغه قومي مشران په نښه شوي، چې د خلکو لپاره د حقونو غوښتنه کوي.
ځايي خلک او قومي مشران د پاکستان پوځ تورنوي، چې د قومي مشرانو او ځايي فعالانو د هدفي وژنو تر شا ولاړ دی او د مخنيوي په موخه يې هېڅ ډول هڅه نه ده کړې.
