د سپین بولدک او چمن تر منځ پر دروازه کاروباریان:  د لارې له  بندیدو سره  مو کاروبار کمرنګه شوی 

په کندهار ولایت کې د سپین بولدک او چین ترمنځ پر لار هر ورځ نه یوازې زرګونه مسافر تګ راتګ کوي بلکي زرګونه نور ماشومانو، ځوانان، ښځې او ان عمر خوړلي کسان هم هره ورځ د کاروبار په موخه د یادې دروازې دواړو خواوو ته تګ راتګ کوي. 

دې کاروباریانو ته په سیمه یيزه لهجه ” لغړیان” ویل کیږي،چې هره ورځ د چمن او سپين بولدک پر دروازه د مسافرو توکي پر شاه او یا په کراچۍ کې  دواړو خواوو ته لېږدوي.

۱۵ کلن محمدخان،چې د خپلې کورنۍ د ګټې وټې یوازنۍ کس دی، دې سخت کار ته يې اوږه ورکړې ده.

دی وايي ډېر کله پر دې لار نه پرېښودل کیږي او آن سواګریز توکي هم ورڅخه اخېستل کیږي،خو په خبره یې دې وروستیو کې دا لاره نوره هم سخته شوې ده.

 هغه زیاته کړه:« د ورځې کله درې پیرې کوو، کله دوې. د ورځې په درې سوه، په پنځه سوه روپۍ کار کوو.»  

د چمن او سپين بولدک تر منځ له پاکستان سره پر دروازه نژدې ۱۲ زره کسان دکاروبار کوي،چې ان معلولین هم په کې شامل دي.

نجیب الله چې یو مالول دی او پر دې لار هره ورځ په لاسي کراچۍ کې د مسافرو توکي  انتقالوي، وايي، په دې ورستیو کې د لارې سختېدو سره سم یې کاروبار هم کمرنګه شوی دی.

هغه زیاتوي:« دغه کراچۍ چلو.  دوه نفره یو،بس دوه زره کاروبارکوو، د ورځې یوه یوه پیره کیږي. نوره اجازه هم نشته دی او کیږي هم نه، ډېره ګڼه ګوڼه ده.» 

دغه سوداګریز توکي چې د کرښې یو او بل طرف ته  لېږدول کېږي، مالیه نه پرې اخېستل کیږي،خو ډېر کله دغه کسان غیرقانوني توکي هم یو او بل لوري ته  وړي.

مسوولین وايي، په ناقانونه توګه د توکو وړل او راوړل جرم دی.

کمېسار مولوي عصمت الله یعقوب وايي:«چون  دواړو لورو ته اوبه نه شته دی. بل کاروبار نه شته دی، که د چمن خلک د، که د بولدک خلک دي د هغو دغه روزګار دی، نو زموږ د سروې مطابق له ۱۰ زرو څخه تر ۱۲ زرو کسان اوړي او راوړي د لغړیانو په نامه باندي.» 

له تېرو څو کلونو راهیسې د سپین بودلک – چمن پر دروازه د مسافرو لپاره د تګ راتګ  لاري سختي شوي،چې ورسره سم د چمن او سپین بولدک پر دروازه يې د  کاروباریانو کار او روزګار هم کمرنګه کړی دی.