Skip to content
پر افغانستان د اسلامي امارت له واکمن کېدو وروسته، امریکا د افغانستان بانک شااوخوا ۹ میلیارده ډالره پانګه چې زیاته برخه یې په نړیوال بانک کې ده، کنګل اعلان کړه او له دغې پرېکړې وروسته افغانستان له اقتصادي او مالي بندیزونه سره مخ شو.
له لنډ ځنډ وروسته د امریکا ولسمشرجوبایډن پریکړه وکړه،چې د کنګل شویو پیسو نیمایي برخه افغانستان ته د بشري مرستو په توګه لیږي او پاتې نورې به د سپتمبر د ۱۱ د قربانیانو کورنیو ته ورکړي.
وروسته له هغه،چې د القاعدې شبکې مشر الظواهري کابل کې ووژل شو، واشنګټن وویل، یو ډالر به هم افغانستان ته ورنه کړي.
د بايډن د دغې پریکړې په غبرګون کې د سپټمبر ۱۱ قربانیانو د کورنیو غړو تازه سپینې ماڼۍ ته لیک استولی او ویلي دي،چې کنګل شوې پیسې یوازې د افغانانو حق دی او دوی ته ورکول یې سم کار نه دی.
د لیک یوه برخه:« د افغانستان د ۷ میلیارده شتمنۍ څخه د سپټمبر ۱۱ د قربانیانو کورنیو ته د پیسو ورکولو پریکړه له قانوني پلوه شکمنه او له اخلاقي پلوه یو غلط کار دی. ژر امر وکړئ او و یې منئ،چې د افغانستان مرکزي بانک پیسې یوازې او یوازې افغانانو پورې اړه لري.»
په دغه لیک کې ویل شوي،چې د ترهګرۍ قربانیان دې د خپل حق پوښتنه محکمو کې وکړي او د افغانانو شتمني د دوی حق نه شي جوړیدی.
په لیک کې وړاندې ویل شوي،دوی د دغو پیسو اخېستلو ته اړ شوي او په هېڅ ډول یې غوښتنه نه ده کړې.
د لیک یوه برخه:« د سپټمبر ۱۱ د قربانیانو په ګډون د ترهګرۍ ټول قربانیان، په محکمه کې د دې ورځې د پوښتنې حق لري. دوی د هغو پیسو حق نه لري،چې په قانوني توګه د افغانانو ملکیت دی. د سپټمبر د قربانیانو د کورنۍ غړي په دې قضیه کې شامل شوي،ترڅو د بې وزله افغانانو پیسې له دوی واخلي.»
که څه هم څو ځله د دغو شتمنیو د آزادلو په تړاو د افغانستان اسلامې امارت له امریکایي چارواکو سره خبرې کړي او ګڼ شمیر هېوادونو یې هم د خوشي کولو غوښتنه کړې،خو امریکا بیا تر اوسه کوم عملي ګام په دې برخه کې اخېستی نه دی.
