د سوېل ختیځ زون د پولیسو روزنیز مرکز قوماندان عبدالوکیل مدني وايي، د پولیسو له دغه روزنیز مرکزه ۹۶ کسان له یو میاشتنیو زده کړو وروسته فارغ شول او د پکتیا بېلابېلو سیمو کې به پر دندو وګومارل شي.
مدني زیاته کړه:«د یوې میاشتې په جریان کې دغو کسانو شرعي ، حقوقي او مسلکي زده کړي او د تلاشۍ او له خلکو سره د چلن مهارتونه یې تر لاسه کړي دي.»
د پکتیا امنیه قوماندان محمد عمر مخلص بیا وايي، د پولیسو د مسلکي کیدو هڅې روانې دي او تر دا مهاله مرکز ګردیز او ټولو ولسوالیو ته یو شمیر مسلکي پولیس لیږل شوي دي.
د مخلص په خبره، دا مهال هېڅ ډول امنیتي ننګونې نشته او د پولیسو په مسلکي کیدو سره به د جنایي پیښو بشپړ مخنیوی وشي.
مخلص زیاته کړه:« ابتدایه حالت یو ډول و، د امنیت په اړه د وخت په تیریدو سره هر څه بدلون کوي، تر اوسه پورې هم ستونزې نشته دی،خو د پولیسو په مسلکي کیدو سره به بشپږ امنیت خوندي او جنایي پیښې به صفر شي.»
د پولیسو له روزنیز مرکزه تازه فارغ شوي سرتیري وايي، یوه میاشت کې یې اړینې زده کړې تر لاسه کړي او د دندو پر مهال به ترې ګټه پورته کوي.
د سویل ختیځ زون د پولیسو له روزنیز مرکزه یو تن فارغ شوی وايي:«ډاډ ورکوو،چې ۲۴ ساعته به د خلکو خدمت کوو او د امنیت ټینګښت لپاره به نه ستړې کېدونکې هلې ځلې کوو.»
