وروسته له هغې چې د حماس اسلامي غورځنګ د خپل دویم مشر یحیی سنوار مړینه تایید کړه، ورسره سم د نوموړي د ترور په تړاو پر نړیواله کچه غبرګونونه هم وښودل شول.
د افغانستان اسلامي امارت د یحیی سنوار پر مړینه ژوره خواشيني ښکاره کړې او له اسلامي نړۍ یې غوښتي چې د فلسطین مظلومو خلکو د داعیې ملا وتړي.
د ریاست الوزراء له ادرسه په خپره شوې اعلاميه کې د فلسطین خلکو ته تسلیت ويل شوی او له اسلامي نړۍ غوښتل شوي چې د فلسطینیانو ملاتړ وکړي.
د اسلامي امارت یو بل لوړپوړي چارواکي انس حقاني یحیی سنوار تاریخي مبارز بللی او وايي، ژوند او مرګ یې دواړه ځانګړي وو.
هغه پر خپله اېکس پاڼه د سنوار پر مړینه خواشیني څرګنده کړې او نوموړی یې د تاریخ د سترو مبارزینو په کتار کې شمېرلی.
حقاني زیاته کړې:« یحیی سنوار د اسلامي امت د تاریخ په هغو سترو مبارزینو کې راغی چې ژوند یې ځانګړی او د شهادت انداز یې خاص و. د اقصی د دې نومیالي شهید د وینو لیکې به ډېرو نسلونو ته د ژوند واقعي مانا تعریف او ډېرو ته به د آزادۍ د لارې نقشه رسم کړي.»
د نړیوالو چارو څارونکي بیا وایي، که اسرائیل او په ځانګړي ډول لوېدیځ غواړي چې په منځني ختیځ کې جګړه پای ومومي، نو اړتیا لېدل کیږي چې اسرائیلي پوځونه نور د فلسطین له خاورې ووځي او هلته روانه ټولوژنه ودروي.
په نړیوالو غبرګونونو کې بیا الازهر د جمعې په ورځ په ښکاره د “فلسطین مقاومت شهیدان” وبلل.
الازهر پر خپله اېکس پاڼه د ځوانانو په ذهنونو کې د “فلسطین مقاومت سمبول” د تحریفولو لپاره د مبارزې پر اړتیا ټینګار کړی او د دوی پر وړاندې یې د “ترهګرۍ” توری کارېدل غندلي.
الازهر زیاته کړې: « وطن، خاوره، هدف او په هدف کې د مرګ په مقابل کې مقاومت او دفاع کول هغه عزت دی چې له هېڅ بل عزت سره نه شي پرتله کېدای. نړیواله ټولنه لکه قبرونو کې د مړو په شان چوپه خوله دي او د نړیوال قانون ارزښت د هغه قلم له بیې سره برابر نه دی چې پرې لیکل شوی دی.»
له بلې خوا، د امریکا ولسمشر جوبایډن ویلي، د حماس غورځنګ د مشر یحیی سنوار مړینه د “عدالت یوه شېبه” په ډاګه کوي.
بایډن زیاته کړې، سنوار د امریکایانو، اسراییلو، فلسطینیانو او یو شمېر نورو وینه تویه کړې وه.
جوبایډن همدارنګه د اسراییلو پر لومړي وزیر غږ کړی چې له فرصته ګټه واخلي او د سولې خبرې پيل کړي.
دا په داسې حال کې ده چې د الجزیزې ټلویزیون انګلیسي څانګې په یوه تحلیلي راپور کې ادعا کړې چې د فلسطین په غزه کې د یحیی سنوار مړینه به د منځني ختیځ روانه کشاله لا پسې پیچلې او سخته کړي.
د دغه راپور پر بنسټ، د سنوار مړینه به د اسراییلو او حماس ترمنځ د اوربند خبرې او هڅې ټکنۍ کړي.
سنوار د ۲۰۱۷ زیږیز کال راهیسې په غزه کې د حماس مشر په توګه فعالیت درلوود، خو د روان کال اګست میاشت کې د اسماعیل هنیه تر مړینې وروسته د هغه ځای ناستی وټاکل شو.
