امرالله د خلم ولسوالۍ ملا سعدي سیمې اوسېدونکی دی، زلزلې يې کور نړولی او د امکاناتو نه لرلو له امله اوس د کورنۍ له غړیو سره بي سرپناه دی.
د خلم ولسوالۍ زلزله ځپلی امرالله وايي: « په لومړي ګام کې یوې خېمې ته اړتیا لرم چې په کې و اوسېږو، دویم خوراکي توکي نه لرو، اوبه نه شته، ښځې او ماشومان وږي ناست دي. کور ویجاړ شوی، دېوالونه یې چپه شول او هر څه ترې لاندې دي.»
د زلزلې یوبل زیانمن ناصر وايي: « د ځینو خلکو کورونه په بل مخ پراته دي او د خاورو لرې کولو وس نه لري. که داسې چې یو سکواټر را وستل شي او دا خاورې لرې کړي، ترڅو خلک بېرته په کې ځای جوړ کړي.»
د سرې میاشتې لومړنيو ارقامو پر بنسټ د وړمې شپې زلزلې بلخ کې ۶۰۷ او سمنګان کې ۳۵۰ کورونه ویجاړ شوي دي.
د دوی په وینا، سیمه کې یې تخنیکي ټیمونه پر سروې او لومړنیو مرستو بوخت دي.
د شمال زون سرې میاشتې ټولنې نشراتو مدیر محمد کریم صالح زاده وايي: « د شمال زون په بلخ او سمنګان ولایتونو کې د زلزلې له امله ګڼو خلکو ته ځاني او مالي زیانونه اوښتي. زموږ د لومړنیو معلوماتو له مخې، په بلخ ولایت کې ۶۰۷ کورونه ویجاړ شوي دي. دا مهال د سمنګان په خلم ولسوالۍ کې زموږ ۴ ټیمونه په سروې بوخت دي، خو د لومړنیو معلوماتو له مخې هلته هم ۳۵۰ کورونه ویجاړ شوي دي.»
په ورته مهال، د خلم ولسوالۍ سیمه ییز مسوولین که څه هم زلزله ځپلو ته له خپلو هر راز مرستو او همکاریو ډاډ ورکوي، خو پر نړیوالو همکارو بنسټونو هم غږ کوي چې د زیانمنو په لاسنیوي کې برخه واخلي.
د خلم ولسوال عبدالقادر حامد وايي: « تر اوسه لازمې او کافي مرستې نه دي شوې. له ټولو خیریه بنسټونو، سوداګرو، ټولو ملي او نړیوالو موسسو څخه غوښتنه کوم چې د زلزله ځپلو خلکو لاسنیوی وکړي، ځکه چې ژمی را روان دی او باید هر څومره ژر چې کېږي، دوی ته سرپناه برابره شي.»
د بلخ، سمنګان، بغلان جوزجان او کندوز ولایتونو ځایې چارواکو د وروستیو معلوماتو پر بنسټ، د تېرې دوشنبې شپې زلزلې۸۲۰ تنه ژوبل کړي او له۳۱ تنو یې ژوند اخیستی.
