Skip to content
کندهار ولایت کې د سرې میاشتې ټولنې د مرستون مشر آمین الله وايي، دغه ولایت کې په دې وروستیو کې د بې وزلو او بې سرپرستو کورنیو په شمېر کې زیاتوالی راغلی دی.
آمین الله وايي، مرستون کې د شاملو کسانو او ماشومانو لپاره د زده کړو په شمول د ژوند ټولې اسانتیاوې برابرې دي او دلته يي ساتنه کوي.
هغه زیاته کړه:« له دې سربېره په کندهار مرستون کې ۱۲ کورنۍ دي،مجموعې تعداد په انفرادي شکل۷۱ کسان دي،چې په دغه ۷۱ کسانو کې کونډې ښځې، یتمې نجوني، یتمیم هلکان او ډېر عمر لرونکي،چې عمرونه يي تر ۸۰ لا لوړ دي، بې وزله هم وي، بې سرپرسته هم وي، له موږ سره اوسیږي.»
قاري جلال الدین،چې د سرې میاشتې له لوري په جوړ شوي، مرستون کې له کالونو راهیسې ژوند کوي، وايي، د محمد ظاهرشاه د واکمنۍ پر مهال د خپلوانو نشتوالي اړ کړی دی،چې نور عمر په مرستون کې تېر کړي.
هغه زیاتوي:« تقریبا د ظاهر شاه په وخت کې زه دلته شامل شوی یم. زما مور او پلار مړه شول. ما خپلوان نه لرل، چې زما حفاظت وکړي،نو زه بیا اړ شوم او مرستون ته راغلم.»
د سرې میاشتي ټولنه مسوولین وايي، په ټول هېواد کې پنځه مرستونونه لري،چې شااوخوا ۸۰۰ بې سرپرسته کسان په کې ساتي،چې یو شمېر یې رواني ناروغان هم دي.
په دې مرستونونو کې سپین ږیري، ښځې او ماشومان ساتل کیږي،چې د کورنۍ سرپرستان نه لري، بې وزله وي او د ژوند اړتیاوې نه شي پوره کولای.
د کندهار اوسېدونکی محمد آصف وايي:« له دوه کاله زیاته موده کېږي،چې دې مرستون ته راغلی یم. زه مجبوره شوم، کور مې نه درلو، ځای مې نه درلود.»
په هېواد کې جګړو زرګونه کورنۍ بې سرپرسته کړي،چې ډېر کم شمېر یې دا مهال په مرستونونو کې ساتل کیږي.
د سرې میاشتي ټولنه وايي، د دوی په مرستونونو کې ټولو شاملو کسانو ته يې د ژوند پوره اسانیتاوي برابري کړي.
