په کابل د یکشنبې پر ورځ د « ۱۴۰۰ کال د سلواغې پر ۲۴ مه » له بېلابېلو ولایتونو د راغلیو قومي مشرانو او مخورو سره د سرحدونو او قبايلو چارو وزارت مسوولینو ناسته وکړه.
ناسته کې د ياد وزارت مسولینو له بېلا بېلو ولایتونو د راغلیو قومي مشرانو او مخورو ستونزو او وړاندیزونه واورېدل او د حل ډاډ یې ورکړ.
د یاد وزارت سرپرست نورالله نوري وايي، تېر نظام د سرحدي سيمو اوسیدونکو ته پاملرونه نه ده کړې او دوی ژمن دي،چې خاصه توجه ورته وکړي.
نوري زیاته کړه:« موږ بدخشان، هلمند، فارياب، پکتيکا، ننګرهار او نورو بېلابېلو ولایتونو کې سرحدي سيمې او حدود کتلي دي، هلته مو د خلکو ستونزې اوریدلي، د هغوی په حالاتو مو ځان خبر کړی دی. په وروستۍ پرېکړه کې چې د وزارت په رهبرۍ مو چې کوم هیت ليږلی دی، يوولس ولایتونه مو له دې ځايه څخه ورته په نښه کړي او دا لړۍ به جریان لري، تر څو د افغانستان ټول سرحدات او ټولې سیمې وګوري.»
نوري وايي، د ګاونډيتوب ټولو اصولو ته ژمن دي او له نورو ګاونډیو هم ورته تمه لري.
نوري زیاتوي:« دویم قدم کې ورته وایو،که چاته ګوته راونیوه، ګوته ورته نیسو، په ګاونډيتوب کې تر هرچا ښه ګاونډيتوب کولای شو او تر هر چا ښه پرې پوهیږو، د اسلام دین له نظره. د خپل سياست له نظره، د خپلو حقونو له نظره، له هر چا د ښه ګاونډيتوب هېله لرو.»
علماوواو د قوم استازو بيا وویل، له شته امنيتي فرصته ګټه اخېستل په کار دي او قومونه دې له اسلامي امارت سره پر ګډه په تعليمي، اقتصادي او ټولو برخو کې کار وکړي.
یو ديني عالم وايي:« دښمن باید په يوه او بله بهانه استفاده ونه کړي، تر څو خپل شوم اهداف تر لاسه نه کړي، سني او شيعه دې وطن کې هغه کسان دي،چې تر یو چتر لاندې يې ژوند کړی او وي به.»
یو بل دیني عالم بیا وايي:« ځوانان، سپين ګيري او ملایان به د اوسني نظام پر ملاتړ د افغانستان په ټولو ولایتونو کې به دغسې ناستې کوو، تر څو پر ګډه دغه ستونزې هوارې او په اقتصادي، سياسي مسایلو کې به د دغه نظام تر څنګ يو.»
يو شمېرقومي مشرانو بيا د وزارت په رهبرۍ غږ وکړ،چې قومونو ته دې يوازې د وعدو ورکولو پر ځای خدمات تر سره کړي.
د سرحدونو او قبايلو چارو وزارت د مالوماتو له مخې،د اسلامي امارت تر حاکمیت وروسته يې له يولس سرحدي سيمو لېدنه کړې،دا لړۍ روانه ده او هڅه کوي،د سرحدي سیمو د اوسیدونکو ستونزو ته ژر رسېدنه وشي.
