د سترې محکمې اداري مرستیال پر مشرۍ یو قضايي پلاوی ایران ته رسېدلی ترڅو د دې هېواد له قضايي چارواکو سره پر بېلابېلو موضوعاتو خبرې وکړي.
د دې پلاوي د سفر موخه له ایران سره د اړیکو پیاوړتیا، په دې هېواد کې د افغان بندیانو د حقونو خوندیتوب، پر اعدام محکومو افغانانو لپاره د بديلو لاور لټولو او يو شمېر نورو مهمو مسايلو خبرې ښودل شوې ده.
د سترې محکمي ویاند عبدالرحمن راشد د دې سفر په اړه وايي: « د سترې محکمې د لوړ پوړي قضايي پلاوي سفر له بېلا بېلو اړخونو ډېر مهم دی. په دې سفر کې به له ایراني لوري سره پر اعدام د محکومو افغانانو لپاره د بديلو لارو لټولو، هېواد ته د افغان بنديانو پر را لېږدولو او د دواړو هېوادونو ترمنځ د قضايي اړيکو پراختيا په موخه مهم بحثونه وشي.»
د نړیوالو اړیکو کارپوه سمیر انګار وايي: « که دا ډول سفرونه په سمه توګه مدیریت شي او په کې شوې ژمنې عملي شي، د افغان کډوالو ډېرې ستونزې به هوارې شي، لکه هېواد ته د افغان کډوالو انتقال او هلته د کار قانوني لارې برابرول. د دې کار لپاره ریښتینې سیاسي ارادې او عملي اقداماتو ته اړتیا ده.»
د افغان کډوالو د حقونو فعالان وایي، ایران په یو شمېر ښارونو او سیمو کې د افغان کډوالو پر ګرځېدو او کار بندیز لګولی او له ټولو حقونو یې بې برخې کړي دي.
دوی تمه لري چې د اسلامي امارت د سترې محکمي د لوړ پوړي قضایي پلاوي له سفر وروسته به ایران د افغان کډوالو د ځورونې او اعدام لړۍ ودروي.
د کډوالو مدافع عبدالرازق عدیل وايي: « زه هیله من یم چې د ایران هېواد به د مهاجرت له نړیوال کنوانسیون سره سم په ایران کې له افغان کدوالو سره چلن وکړي. دغه کنوانسیون دولتونو ته دا حق نه ورکوي چې حتا له هغو کسانو سره هم زور زیاتی وکړي چې په غیر قانوني توګه د دوی هېواد ته ننوتي وي. د ایران او اسلامي امارت ترمنځ د هوکړې لاسلیک کېدل په افغانستان کې د روان ناورین یو مهم ګام دی او کولی شي د دواړو هېوادونو ترمنځ د کړکېچ په کمولو کې مهم رول ولوبوي. هیله ده په دې سفر سره د دواړو هېوادونو اړیکې ښې شي.»
د سیاسي چارو کارپوهان وایي، ایران هره ورځ لسګونه افغان کډوال او کورنۍ په جبري ډول د هرات اسلام کلا بندر له لارې هېواد ته راليږي.
دوی وړاندیز کوي چې د سرپرست حکومت چارواکي بايد د افغان کډوالو د اعدامولو موضوع ته په دې سفر کې لومړیتوب ورکړي.
د سیاسي چارو کارپوه فیض محمد ځلاند وايي: « افغانان په یو ډول نه یو ډول د بدنامولو په موخه محکمو او اعدام ته برابر شوي. هیله ده تللی پلاوی د دغو افغانانو ژوند وژغوري او په عزت یې هېواد ته را ستانه کړي.»
دا په داسې حال کې ده چې له دې وړاندې د افغان کډوالو د ستونزو د حل په موخه په کابل او تهران کې د اسلامي امارت او ایراني چارواکو ترمنځ ګڼې ناستې شوې، خو بیا هم د افغان کډوالو پر وړاندې د دې هېواد په تګلارو کې بدلون او نرمښت نه دی راغلی.
