د زمري (اسد) ۲۸ مه له انګرېزي ښکېلاکه د آزادۍ د بېرته اخیستلو ۱۰۵ مې کلیزې سره برابره ده. د نورو کلونو په څېر، سږ کال هم دغه ورځ په خواله رسنیو کې په پراخه کچه نمانځل شوې او د بهرمېشتو افغانانو له خوا هم په بېلابېلو هېوادونو کې نمانځغونډې جوړې شوې دي.
له پخوانیو او اوسنیو چارواکو سربیره، سیاسي څېرو او په خواله رسنیو کې فعاله ژرونالېستانو، لیکوالو او ملي لوبغاړو د دې ورځې په مناسبت د مبارکۍ پيغامونه ورکړي او تر ډېره یې د ولس پر یووالي ټینګار کړی.
د افغانستان پخواني ولسمشر حامد کرزي پر خپله ایکس پاڼه د مبارکۍ ورکولو تر څنګ پر سرپرست حکومت غږ کړی، چې د نجونو پر مخ تړلي ښونځي پرانیزي.
کرزي زیاته کړې:« په همدې ویاړلي مناسبت او په واقعي مانا د خپلواک او پرخپلو پښو ولاړ افغانستان لپاره یو ځل بیا پر سرپرست حکومت غږ کوم، چې په هېواد کې د نجونو پر مخ د ښوونځیو او پوهنتونونو دروازې ژر تر ژره خلاصې کړي، ترڅو د علم په ګاڼه سمبالې نجونې د خپلو وروڼو ترڅنګ د هېواد د پرمختګ او له احتیاج څخه د خلاصون لپاره خپله وڼده ادا کړي.»
د اسلامي امارت د رهبرۍ غړي حافظ انس حقاني هم پر خپله ایکس پاڼه د خپلواکۍ د بېرته اخیستلو مبارکي ورکړې او وايي، د خپلواکۍ شاته باید ستر آرمانونه وي.
هغه زیاتوي:« په حاکمیت کې د قدرت تر شا باید تر قدرت پورته ستر آرمان ولاړ وي، په داسې حالت کې بیا د ملتونو د نېکمرغۍ سبب ګرځي؛ ۲۸ مه د اسد مبارک.»
همدارنګه د مخکېني حکومت د ملي روغې جوړې سترې شورا مشر ډاکټر عبدالله عبدالله هم د دې ورځې نمانځل د سرښیندنو او قربانیو پایله بولي او له خلکو د اتحاد او اتفاق غوښتنه کوي.
هغه زیاته کړې:« د افغانستان آزادي غوښتونکیو او مبارزو خلکو پر همدې ورځ د شاه امان الله خان او نورو مبارزینو تر مشرۍ لاندې د بریټانوي امپراتورۍ د یرغل او لاسوهنو پر خلاف قیام وکړ او خپلواکي یې ترلاسه کړه.»
له دې سره، بهر مېشتو افغانانو هم په بېلابېلو هېوادونو کې د افغانستان د خپلواکۍ ۱۰۵ کلیزه نمانځلې او دا یې د ټولو افغانانو لپاره له ویاړ ډکه ورځ بللې ده.
د تېر په څېر، سږ کال هم په خواله رسنیو کې افغانانو د خپل هېواد ملي بیرغ انځورنه خپاره کړي او ټولو افغانانو ته یې د دې ویاړلې ورځې مبارکي ویلې ده.
