د زمري ۲۴مه ، چې واک ته د اسلامي امارت د رسېدو له درېيمې کليزې سره برابره ده، پر کابل سربېره ولايتونو کې هم ونمانځل شوه.
د ننګرهار اوسېدونکي وايي، خوښ دي، چې د امنيت په فضا کې ژوند کوي او نوره جګړه ختمه شوې ده.
د ننګرهار ولایت یو تن اوسېدونکی وايي:« دا یوه تاریخي ورځ ده او موږ یې په خوشالۍ نمانځو. زموږ پیغام هېواد والو ته دا دی، چې دغه شان ورځې ونمانځي او د خپل نظام تر شا ودرېږي.»
په خوست، پکتيا، پکتيکا او غزني کې و لایتونو کې هم په دې اړه پروګرامونه جوړ شوي او ځايي اوسېدونکي په کې له سرپرست حکومته د خپلو مشروع او حقه غوښتنو د منلو غوښتنه کوي.
د غزني ولایت یو تن اوسېدونکی رفیع الله وايي: « زه له دولتي چارواکو غوښتنه کوم، چې له هر څه وړاندې ولس په غېږ کې ونیسي او مشروع حقونه یې ورکړي.»
دغه راز د پکتیا ولایت یو تن اوسېدونکی عبدالرحمن وايي: «د دې خاروې یو خاصیت دا دی، چې هېڅکله د پردیو واکمني پر ځان نه مني. زموږ چارواکو ته په کار ده،چې خپل مسوولیتونه وپېژني او د خلکو حقونه ورکړي.»
همدارنګه د خوست اوسېدونکي هم د خلکو پر یوالي ټینګار کوي او وایي، د سرپرست حکومتي چارواکي او خلک باید یو بل ته لاسونه ورکړي.
د خوست ولایت یوتن اوسېدونکی احمد الله وايي:« دا خبره ډېره مهمه ده، چې موږ ټول سره یو لاس شو، که دا د ښوونځیو فارغان دي که د مدرسو، ټول باید د خپل ولس لپاره کار وکړي.»
په کندهار کې بيا د دې ورځې په مناسبت نظامي پرېډ ترسره شوی او امنيتي مسوولینو عامو خلکو ته ډاډ ورکړی، چې د دوی امنيت به په ټوله مانا ټینګ وساتي.
په کندهار کې یو تن امنیتي سرتېری په دې اړه وايي: « موږ خلکو ته ډاډ ورکوو، چې زموږ امنیتي او دفاعي ځواکونه هر ډول حالاتو ته پوره چمتو دي او د خلکو دفاع کوي.»
له کندهار سربېره هلمند، زابل او اروزګان ولایتونو کې هم واک ته د اسلامي امارت د رسېدو درېیمي کلیزې په مناسبت ځانګړي مراسم نیول شوي، چې پر نظاميانو سربېره په کې عامو خلکو هم برخه لرله.
د ولايتونو چارواکي د خلکو غوښتنې د دوی حق ګڼي او د منلو ډاډ يې ورکوي.
دوی په ورته مهال له خلکو هم غواړي، چې د ډاډمن امنيت د تامين لپاره دې د اوسني سرپرست حکومت ملاتړ ته دوام ورکړي.
د خوست والي عبدالقیوم روحاني وايي: « که د هرې ادارې منسوب خپل ملت ته په دې سترګه وګوري چې دا خلک د دوی د کورنۍ غړي دي، نو دا به زموږ د بریا لامل شي.»
همدارنګه د ننګرهار اطلاعاتو او کلتور ریاست د اطلاعاتو امر صدیق الله قریشي وايي، د تاریخي ورځو لمانځل مستند تاریخ جوړوي.
هغه زیاتوي:« دغه شان نمانځنې د دې لپاره کېږي، چې ولس په خپلو قربانیو خبر شي او راتلونکو نسلونو ته مستند تاریخ پرېږدي.»
د درېيو کلونو په پوره کېدو سره اوس خلک له سرپرست حکومت غوښتنه کوي، چې د واکمنۍ په څلورم کال دې رسميت پېژندنې او له نړيوالو سره د مثبتو اړيکو ټينګولو ته لومړیتوب ورکړي او په دې اړه دې جدي ګامونه پورته کړي.
