حمدالله محب د سولې په برخه کې پر زلمي خلیلزاد توندې نیوکې کړې دي.
د طالبانو او امریکایانو ترمنځ د افغان سولې په تړاو پټو او مبهمو خبرو بلاخره د افغان حکومت د صبر کاسه نسکوره کړه.
محب امریکايي خبریالانو ته ویلي، خلیلزاد د شخصي ګټو په موخه افغان حکومت د سولې له خبرو څنډې ته کړی.
اخوا د محب دغو څرګندونو ته د امریکا بهرنیو چارو وزارت په غبرګون کې راغلي ، پر خلیل زاد برید د امریکا متحده ایالاتو پر بهرنیو چارو وزارت برید دی.
په امریکا متحده ایالاتو کې د افغانستان لپاره پاتې شوی پخوانی افغان ډیپلوماټ او په اوس کې د افغانستان د ملي امنیت شورا سلاکار حمد الله محب د زلمي خلیل زاد په اړه جدي نیوکې کړي او د دوحې د ناستې په اړه یې افغان حکومت سره د کمو مالوماتو د شریکولو له امله پر خلیل زاد توندې نیوکې کړي.
د ملي امنیت شورا سلاکار ادعا کړې چې خلیلزاد د شخصي ګټو لپاره افغان حکومت د سولې له خبرو څنډې ته کړی او انګیرنه یې دا ده چې خلیلزاد غواړي په دا ډول حرکاتو سره د موقت حکومت مشري تر لاسه کړي.
د ملي امنیت شورا سلاکار حمدالله محب په یوه مرکه کې داسې ویلي (( قطر کې روانې خبرې شفافې نه دي، په تېر کې د زلمي خلیلزاد هڅې د دې لپاره وې چې ځان ولسمشریزو ټاکنو ته کاندید کړي او د سولې په برخه کې یې له روانو هڅو داسې انګیرل کیږي چې هغه غواړي په خپله مشرۍ موقت حکومت رامنځته کړي.))
د امریکا د بهرنیو چار وزارت د محب دغو څرګندونو ته توند غبرګون ښودلی او دا یې د سولې لپاره زیان اړوونکې بللي دي.
د امریکا د بهرنیو چارو وزارت مرستیال ویاند روبرت پلدينو داسې ویلي (( موږ په هر قدم کې د ولسمشر غني اجراییه مشر عبدالله او لوړ پوړو افغان چارواکو سره د سولې په برخه کې د هر پرمختګ په اړه له هغوی سره مالومات شریک کړي، او مشورې مو ورسره کړې دي.
زلمی خلیلزاد له هر سفر وروسته کابل تللی، له افغان چارواکو سره یې د سولې خبرې شریکې کړي نو د سولې خبرې له افغان چارواکو سره بې مشورې نه دي))
داسې راپورنه هم شته چې د امریکا د بهرنیو چارو وزیر پمپيو ښاغلی محب احضار کړی، خو د افغانستان د ملي امنیت شورا د محب له خولې د شویو څرګندونو پخلی کوي، خو احضارول یې رد کړي دي.
له دې وړاندې افغان حکومت ویلي و چې د امریکایانو او طالبانو تر منځ روانې خبرې دوی سره په پوره همغږۍ روانې دي.
زلمي خلیلزاد د پنځم پړاو خبرو وروسته وویل، د بهرنیو ځواکونو په وتو او د طالبانو له لورې په تضمین تر ډېره حده پرمختګ شوی، خو دا یې هم ویلي وو چې د پوره بریا لپاره اوربند او له افغان حکومت سره د طالبانو خبرې حتمي دي.
په پام کې ده چې د مارچ میاشتې په وروستیو کې د طالبانو او امریکایانو تر منځ شپږم پړاو خبرې پیل شي.
