Skip to content
د زابل ولایت ښاروال لطف الله لطیفي وايي، د ښار پرمختيايي او سربزۍ په برخه کې یې هڅې پیل کړي، خو پر وینا یې د بودیجې د کمښت له امله له ستونزو سره مخ دي.
لطیفي وايي، د کلات ښار د پرمختيايي چارو لپاره یو شمېر موسسو ورسره ژمنې کړي، خو تر اوسه پورې عملي شوي نه دي.
لطیفي له اړوند موسساتو غوښتنه کوي،چې د کړو ژمنو د عملي کېدو تر څنګ دې د پرمختيايي چارو په برخه کې خپلې مرستې زیاتې کړي.
هغه زیاته کړه:«له موږ سره یو شمېر موسساتو د سړکونو د پخولو او ښار په سربزۍ په برخه کې ژمنې کړي،خو تر اوسه پورې یې عملي کړي نه دي. موږ په دې برخه کې د بودیجې له کمښت سره مخ یو، خو له موسساتو غواړو،چې خپلې کړې ژمني عملي کړي.»
په همدې حال کې د دغه ولایت اوسېدونکي، که څه هم په دې برخه کې د ښاروالۍ هڅې ستايي، خو د موسساتو تر څنګ یې پر شتمنو او ملي سوداګرو غږ وکړ،چې د ښار په بیارغونه او پرمختیايي چارو کې دې مرستې وکړي.
د زابل ولایت یو تن اوسېدونکی سیف الله وايي:« موږ د ښاروالۍ له کارونو او هڅو خوښ یو،د ښار په پاکوالي کې يې زیاته پاملرنه کړې ده،خو له شتمنو او سوداګرو غواړو،چې د ښار په بیارغونه او سربزۍ کې له ښاروالۍ سره همکاري او مرسته وکړي.»
زابل چې د هېواد د تر ټولو لویې لارې، هرات- کابل په اوږدو کې پروت ولایت دی،خو د اوسېدونکو پر وینا يي، چې تېرو شلو کلونو کې د پراختیايي چارو تر څنګ روغتیا، پوهنه او سوداګرۍ په ګډون ګڼو نورو برخو کې هېڅ پاملرنه ورته نه ده شوې.
