زابل ته له غزني او ارزګان سلګونه وسله وال طالبان ور ټول شوي چې سقوط یې کړي.
د زابل والي رحمت الله یارمل وايي، له غزني او ارزګان سلګونه وسله وال راټول شوي څو زابل سقوط کړي.
په تازه جګړو کې چې تېرو دوو ورځو کې د شملزو او شینکۍ ولسواليو کې شوي، طالب وسله وال توانېدلي، چې د شملزو ولسوالۍ مرکز او د شینکۍ ولسوالۍ اړوند “سیوري” سيمه کې د پولیسو یو لوی مرکز د څو ساعتونو لپاره تر خپل واک لاندې راولي.
دغه سيمې، چې بیرته د امنیتي ځواکونو تر سختې جګړې وروسته د افغان حکومت په کنټرول کې شوي، دزابل د امنیه قوماندانۍ اړوند د عملیاتي کنډک قوماندان او د شملزو ولسوالۍ د ملي امنیت مدیر په ګډون ۳۴ سرتېري په کې وژل شوي او ۱۸ نور ټپيان دي.
د زابل د ولایتي شورا مشر د دغې جګړې د اوږدېدو او سرتېرو د مرګ ژوبلې اوښتو سبب، د چارواکو تر منځ نه همږغي او پولیسو ته پر وخت د ملي اردو د مرستې نه رسېدل ګڼي.
د شورا رییس رییس عطا جان حق بیان همدا ډول پر مرکزي حکومت تور پوري کوي، چې له تېرو دوو میاشتو راهیسې په ولسواليو کې د محاصره سرتېرو لپاره یې د مرستې غوښتنه نه ده منلې.
خو د زابل والي رحمت الله یارمل بیا د دغه ولایت د چارواکو تر منځ د نه همږغۍ خبره ردوي او وايي، په ولایتي کچه د مسوولینو تر منځ همږغي موجوده او طالبانو هیڅ سیمه تر اوسه نه ده نيولې.
یارمل وايي، د زابل ترڅنګ له ارزګان او غزني څخه سلګونه طالب وسله وال دغه ولایت ته راغلي، تر څو ځينې ولسوالۍ سقوط کړي، خو په وینا یې، چې وسله وال د افغان سرتېرو په سخت مقاومت سره پر شاه تمبول شوي دي.
ها خوا طالبانو هم د یوه پیغام په خپرولو سره ادعا کړې، چې د دغه ولایت د سیوري نا رسمي ولسوالي، چې اوس د شینکۍ ولسوالۍ اړوند سيمه ده په بشپړ ډول نيولې ده.
