د زابل ولایت مرکز کلات ښار اوسېدونکي وايي، ښار طالبانو محاصره کړی، له ولسواليو سره یې ټولې لارې تړل شوي، کاروبار یې پر ټپه درېدلی او بازارونو کې د خوراکي او غیر خوراکي توکو بیې څو برابره لوړې شوي.
د زابل ولایت ټولې لس وسوالۍ طالبانو له تېرو درېیو میاشتو راهیسې له یو په بل سې نيولي، مرکز کلات ښار یې محاصره کړی او له ولسواليو سره یې د تګ راتګ ټولې لارې تړل شوي دي.
دوی د جګړې له دواړو لوریو غوښتنه کوي،چې کلات ښار کې دې د ملکي وګړو د ژوند او ورځنیو چارو پر وړاندې پراته محدودیتونه له منځه یوسي، تر څو خپل ژوند ته په عادي ډول دوام ورکړي.
د کلات ښار یو تن اوسېدونکی وايي:« کاروبار نه شته. خلک بهر نه راوځي. د ولسوالیو ټول خلک په خپلو کلیو کې دي او بازار ته نه راوځي.»
د کلات ښار اوسېدونکی:« جګړې پر بازار ډېر اغېز کړی دی. امنیت ډېر ګډوډ دی. د ولسوالیو خلک نه راځي او سودا نه اخلي. کارونه نشته او ډېری خلک وزګار دي.»
په همدې حال کې د یاد ولایت امنیه قوماندان ویس احمد صمیمي وايي، د تازه پلانونو له مخې به وکولائ شي،چې دغه ښار له محاصرې خلاص کړي.
هغه وايي، دغه پلان کې د مرکز کلات ښار او ولسواليو تر منځ د تړلو لارو د خلاصون پوځي عملیات هم شامل دي.
صمیمي زیاته کړه:«موږ په ډېر لنډ وخت کې لویې لارې ته پلان لرو. کومې ولسوالۍ،چې اوس طالبانو په کې د پرمختګ ټولې برنامنې قطعه کړي دي، ولسونه نا امېده دي. موږ په ټوله کې د ولسوالیو او لویو لارو بېرته نیولو لپاره پلانونه لرو. انشاء الله تاسو به ډېر ژر د لوی پرمختګ شاهدان واوسئ.»
د کندهار – کابل لاره چې د هېواد سوداګریز ترانزیټ لپاره مهمه ګڼل شوې، ډېره برخه یې په زابل کې تېره شوې.
دغه ولایت کې وروستیو جګړو او ناامنیو د یادې لارې امنیت هم ننګولی او له امله یې د هېواد اقتصاد ته د پام وړ زیان رسېدلی دی.
