Skip to content
د هېواد سویلي زابل ولایت یو شمېر اوسېدونکي وايي،د زابل په دولتي روغتون کې ناروغو مراجعینو ته درمل نه ورکول کېږي او ناروغان اړ دي، چې د روغتون د ډاکټرانو ورليکل شوي درمل له بازاره په پیسو واخلي.
دوی له اړوند ارګانونو او د روغتيا په برخه کې له مرستندویه موسسو د یاد دولتي روغتون لپاره د درملو د مرستې غوښتنه کوي.
د زابل ښار یو تن اوسېډونکی خوشال ا وايي:« موږ همدا یو روغتون لرو،خو کله چې ناروغان ورته یوسو، درمل نه ورکوي، وايي تاسو درمل له بازاره واخلئ. موږ د روغتیا وزارت او له موسساتو غوښتنه کوو، چې یاد روغتون ته دې د درملو په برخه کې مرسته وکړي.»
خو د دغه لایت مرکز کلات عمومي روغتون سرطبیب احمد حریفال بیا وايي، د دوی د روغتون د اصولو او امکاناتو له مخې یوازې هغو ناروغانو ته درمل ورکول کېږي،چې یاد روغتون کې بستر وي او هغه کسان چې بستر ته اړتیا نه لري، درمل باید له بازاره واخلي.
حریفال زیاته کړه:« نه داسې نه ده، موږ یوازې هغو ناروغانو ته درمل د روغتون له امکاناتو ورکوو،چې په همدې روغتون کې بستر وي. کوم ناروغان،چې یوازې د ډاکټر د نسخې لپاره راځي او بستر ته اړتیا نه لري، د روغتون د اصولو له مخې درمل باید له بازاره واخلي.»
په همدې حال کې د زابل ولایت ځینې نور اوسېدونکي بیا همدا ډول د لري پرتو ولسواليو په روغتیايي مرکزونو کې د مسلکي ډاکټرانو د نشتون یادونه کوي.
دوی وايي،د لري ولسواليو په روغتیايي مرکزونو کې د مسلکي ډاکټرانو نه مجودیت خلک له ګڼو ستونزو سره مخ کړي دي.
د زابل ولایت یو تن اوسېدونکی ذبیح الله وايي:«په یو شمېر لرې ولسوالیو کې لا هم روغتیايي مرکزونو کې مسلکي ډاکټران نشته دی، له همدې امله د ولسوالیو اوسېدونکي له ګڼو ستونزو سره مخ دي.»
خو د دغه لایت د عامې روغتیا مشر مولوي عبدالحکیم بیا وايي، دغه ولایت کې د تېرو میاشتو پرتله په لرې پرتو ولسوالیو کې روغتیايي چوپړتیاوې زیاتې شوي او د دې برخې کیفیت به هم په تدریجي ډول لوړ شي.
عبدالحکیم زیاته کړه:«زموږ روغتیايي چوپړتیاوې په لومړیو کې یوه اندازه ټکنۍ وې، خو د تېرو څو میاشتو پرتله مو اوس ټولو ولسوالیو ته روغتیايي چوپړتیاوې ډېرې شوي دي او په تدریجي ډول به یې کیفیت هم ښه شي.»
دا مهال د زابل مرکز کلات پر کچه یوازې یو سل بستریز دولتي او درې نور خصوصي روغتونونه فعالیت کوي،چې په استثنايي حالاتو کې د ځينو پرمختللو طبي وسایلو د کمښت په خاطر یې یو شمېر ناروغان کندهار او یا هم کابل ته ليږل کېږي.
