Skip to content
د روغتیا چارسمبالی وزیر قلندر عباد نن شنبه د « ۱۴۰۰ کال د تلې پر ۳ مه» د یاد وزارت کارکوونکو ته رسما معرفي او خپله دنده یې پيل کړه.
مولوي شهاب الدین دلاور د عباد پېژندنې په ناسته کې د خبرو پر مهال وویل، د نوې رهبرۍ په راتګ سره د روغتیا په برخه کې شته ستونزې به لمنځه ولاړې شيي او د زرګونه ناروغانو بهر ته د تګ مخه به ونیول شي.
دلاور وایي، یوازې تېرو شلو کلونو کې ۴ میلیونه کسان په نشه يي توکو روږدي شوي، چې اوس مهال درملنې ته اړتیا لري.
په ورته وخت کې دلاور له نړیوالو غوښتنه وکړه چې په دې برخه کې ورسره همکاري وکړي.
دلاور زیاته کړه: «امریکا ویل چې په افغانستان کې ترهګر له منځه وړو. موږ د نشه یي توکو د لمنځه وړلو لپاره راغلي یو. دوی نه یوازې نشه يي توکي له منځه یو نه وړل، بلکې ۴ میلیونه کسان یي پر نشي یي توکو روږدي کړل، چې ځوانان، سپین ږیري، ښځې او ماشومان په کې شامل دي.»
نوي ټاکل شوي سرپرست وزیر قلندر عباد ژمنه وکړه چې لومړیتوب یې روغتیایي سکټور کارکونکو ته تنخوا ورکول، د شته ستونزو پای ته رسول، په زونونو کې روغتونونه جوړول او بهر ته د ناروغانو د تګ مخنیوی کول دي.
عباد زیاته کړه: «زه ژمنه کوم چې د روغتیا په برخه کې به شته ستونزې له منځه یوسم. لومړی به روغتیایي پرسونل ته پر وخت د تنخوا ورکړم.»
د روغتیا نړیوال سازمان استازي هم وویل په افغانستان کې د روغتیا وزارت او بشردوستانه مرستو په برخه کې له افغانستان ملاتړ کوي.
