هالنډ او کاناډا،چې د رسنیو ازادۍ نړیوال ایتلاف دمشرۍ چارې ور ترغاړې دي، پرون یې اعلان وکړ،چې له دې وروسته افغانستان د دې ایتلاف غړیتوب نه لري.
د رسنیو ازادۍ نړیوال ایتلاف له لوري په خپره شوې خبرپاڼه کې ویل شوي، چې په افغانستان کې د رسنيو وضعيت د دې ایتلاف له ژمنو سره همغږی نه دی او له همدې امله ګډې شورا دغه پریکړه کړې ده.
د خبرپاڼې یوه برخه:« دا ښکاره ده،چې افغانستان کې د رسنیو آزادۍ وضعیت نور د دې ایتلاف له نړیوالو ژمنو سره همغږی نه دی. واک ته د طالبانو له رسېدو وروسته دوی د رسنیو پر آزادیو محدودیتونه زیات کړي او د خبریالانو او رسنیو کارکوونکو ژوند یې ګواښلی دی. طالبانو پر خبریالانو بریدونه کړي، نیولي یې دي، شکنجه کړي یې دي او ښځې یې له رسنیو اېستلي دي،چې دا د دې لامل شوی،چې د رسنیو خپلواکي له منځه لاړه شي او د خبریالانو ورځنی ژوند په خطر کې تېر شي.»
پر کور دننه د ژوناليستانو ملاتړي بنسټونه د رسنيو د ازادۍ نړيوال ايتلاف ياده پريکړه خواشينونکي او د افغان ژوناليستانو په حق کې ښکاره ظلم بولي او باور لري،چې ياد ايتلاف د دې پريکړې څخه د سياسي فشار په توګه ګټه اخلي.
د افغانستان د ژوناليستانو مرکز د رسنيو د بیان ازادۍ نړيوالي ټولنې انديښنه تائيد کړي او ويلي دي،چې په تير يوه کال کې د خبريالانو او رسنيو کاروکونکو پر وړاندې د تاوتريخوالي، او زورونې ۲۴۵ پیښې ورسره ثبت دي.
د افغانستان د ژوناليستانو مرکز:« د افغانستان د خبريالانو مرکز په افغانستان کې د بیان ازداۍ وضعيت په اړه د بیان ازادۍ د نړيوال ايتلاف انديښنه منيؤ د افغانستان د ژوناليستانو مرکز د راپور له مخې، د تير يوه کال په جريان کې د خبريالانو او رسنيو کارونکو پر وړاندې د تاوتريخوالي او ناسم چلن ۲۴۵ پیښې ثبت شوې دي،چې په کې د نیولو ترڅنګ ،ګواښونه ،ټپي کول او د کارمندانو وژنه په کې شامله ده.»
د افغانستان د بیان ازادۍ کور هم یوه خبرپاڼه کې پر يادې پريکړې خواشيني ښودلې او د رسنيو او بیان ازادۍ له ټولو ملاتړو سازمانونو یې غوښتي،چې د افغاني رسنيو ملاتړ وکړي او په روان بد وضعيت کې ورسره همکاري وکړي.
د خبرپاڼې یوه برخه:« د افغانستان د بیان ازادۍ کور د بیان ازادۍ نړيوال ايتلاف کې د افغانستان دغړيتوب لغوه کولو په پرېکړه خواشينی دی. دا کار ښاييؤچې په افغانستان کې د بیان او رسنيو ازادۍ وضعيت خراب او محدود کړي. د بیان ازادۍ له کوره د نړيوالو سازمانونو او هېوادونو چې د بیان له ازادۍ ملاتړ کوي،غوښتنه کوو،چې د افغانستان د رسنيو اوسنی بد حالت هېر نه کړي او له افغان رسنيو سره په بېلابېلو برخو کې همکاري وکړي. افغانۍ رسنۍ په اوس وخت کې بد حالت تجربه کوي.»
د افغانستان د اطلاعاتو او کلتور وزارت د رسنیو د ملاتړ له نړیوال ایتلاف څخه د افغانستان غړیتوب د ایستلو پرېکړه غندلې او دا یو اړخیز عمل د افغانستان له واقعیتونو ناخبري بولي.
یاد وزارت زیاته کړې:« نړیواله ټولنه باید د افغانستان واقعیتونه درک کړي. ددوی دغه کړنه له حقایقو سره په ټکر کې او د خواشینۍ وړ ده، د اطلاعاتو او فرهنګ وزارت به د بیان له ازادۍ ملاتړ ته دوام ورکړي او له رسنیو او د رسنیو د ملاتړ نړیوال ایتلاف دې په خپله وروستۍ پرېکړه له سره غور وکړي.»
