د اسلامي امارت رئیس الوزرا محمد حسن اخوند خپله لومړنۍ وینا کې پر ولس غږ کړی،چې واک ته د اسلامي امارت د رسېدو په تړاو دې شکر وباسي.
اخوند ولس ته په خطاب کې ویلي، فقر او بېکاري د اسلامي امارت له راتګ وړاندې هم موجوده وه،خو په وینا یې که ولس د اسلامي امارت ملاتړ وکړي،شته ستونزې به هم ډېر ژر حل کړي.
اخوند ویلي، اسلامي امارت له هېچا سره د رزق ژمنه نه ده کړې، بلکې دا ژمنه الله کړې او هغه به یې ورکوي.
هغه ولس ته په خطاب کې ویلي، د اسلامي امارت مسوولین له تاسې پیسې نه غلا کوي او نه هغه کسان دي،چې خپل جېبونه ډکوي.
نوموړي ویلي، ملت دې هوښیار وي،چې د مخکیني نظام بعضې کسان چې په دې ملت کې پاتې دي او پټ دي داسې څرګندونې کوي،چې ټول ملت ته اندېښنې پیدا کوي او پر دې مبارک نظام یې شکمنوي.
په ورته و خت کې اخوند د اسلامي امارت پر والیانو،ولسوالانو او ټولو مسوولینو هم غږ وکړ،چې د هغو خلکو فریاد واوري،چې د چارواکو دروازه کې ولاړ دي.
نوموړي د تیر حکومت نیمګړتیاوې هم بیان کړي او زیاته کړې یې ده،چې د اسلامي امارت له راتګ وروسته افغانستان کې وضعیت ښه شوی دی.
رییس الوزرا ویلي، دوی د تېرو حکومتونو برعکس افغانستان کې د ښځو پت او عفت خوندي کړ او ژر به یې نور حقوق هم ورکړل شي.
هغه ویلي، په ټول افغانستان کې داسې نر نه شته دی،چې د یوې ښځې عزت ته په بد نظر وګوري، خو که دا چاره یې وکړه له سخت قانوني چلن سره به مخامخ شي.
هغه ویلي،اوسنی حکومت تر پخوانیو هغو ډېر ټول شموله دی او د هر قوم او ژبې خلک په کې شته دی.
نوموړي بهرنیو هېوادونو او ګاونډیانو ته هم ډاډ ورکړ،چې اسلامي امارت د هېچا په کورنیو چارو کې د لاسوهنې نیت نه لري.
دا لومړی ځل دی،چې د اسلامي امارت د بیا واکمن کېدو وروسته رییس الوزرا ملا محمد حسن اخوند په رسنیو کې وینا کوي.
