د اسلامي امارت بهرنیو چارو وزارت وايي، د دوحې پروسې د خصوصي سکټور کاري ډلې په درېیمه ناسته کې د اسلامي امارت له بیا واکمنېدو راهیسې پر لاسته راوړنو سربېره، د خصوصي سکټور د ودې او شمولیت او همداراز په چارو کې د همغږۍ او شفافیت پر رامنځته کولو بحثونه وشول.
د بهرنیو چارو وزارت ویاند وايي، په دې ناسته کې چې د ملګرو ملتونو د مرستندویه ماموریت(یوناما) په مشرۍ جوړه شوی وه، ښکېلو اړخونو له خصوصي سکټور ملاتړ څرګند کړ او له یاد سکټور سره یې د دوامدارې همکارۍ ژمنه وکړه.
د بهرنیو چازو ورازت ویاند ضیاء احمد تکل وايي: « همداراز ګډونوالو هم په خپل وار د اسلامي امارت د هڅو او لاسته راوړنو د ستاینې ترڅنګ د خصوصي سکټور د حمایې په برخه کې د خپلو ترسره کړو همکاریو یادونه وکړه او د دوامدارې همکارۍ لپاره یې خپله ژمنتیا څرګنده کړه. ټولو اړخونو ننګونو ته د رسېدو لپاره وړاندیزونه وکړل او په لا ډېرې همغږۍ ټینګار وشو.»
یوناما بیا د یوې خبرپاڼې په خپرولو سره ویلي، په دې ناسته کې د نشه یي توکو پر وړاندې مبارزې او خصوصي سکټور د پیاوړتیا پر څرنګوالي هم خبرې شوې دي.
په دې اړه د یوناما په خبرپاڼه کې زیاته شوې، په دې ناسته کې د نشه یي توکو پر وړاندې مبارزې په برخه کې د اسلامي امارت او نړیوالې ټولنې پرمختګونه او لاسته راوړنې ارزول شوې دي.
د یوناما راپور دغه راز زیاتوي: « د نشه یي توکو پر وړاندې مبارزې کاري ډلې د هغو افغانانو د ملاتړ لپاره چې مخکې یې عواید د کوکنارو په کښت او د افیمو په غیر قانوني تجارت متکي وو، د نشه یي توکو د کارولو مخنیوي او د روږدو کسانو د درملنې او همداراز د نشه یي توکو د تولید او تجارت د مخنیوي لپاره د قانون پلي کولو لپاره د افغانستان او نړیوالې ټولنې هڅې و ارزول شوې.»
که څه هم د بهرنیو چارو وزارت د دغو ډلو د راتلونکو بحثونو په تړاو څه نه دي ویلي، خو یوناما بیا په خپره کړې خبرپاڼه کې لیکلي چې په دې ناسته کې په دواړو برخو کې د افغانانو د ملاتړ لپاره لومړیتوبونه په نښه شول، د ښکېلو خواو ترمنځ د تماسونو او خبرو په زیاتوالي ټینګار وشو. د یوناما په خبرپاڼه کې د ټولنې په اقتصادي ثبات کې د خصوصي سکټور رول خورا مهم بلل شوی.
په ورته وخت کې د چارو شنونکي هم ورته نظر لري او وايي، په ټولنه کې د اقتصادي ستونزو د حل لپاره په کار ده چې بهرنۍ پانګونه جلب شي.
د سیاسي چارو شنونکی حکمت الله حکمت وايي: « هیله ده چې د دوحې فارمټ غونډه چې د ملګرو ملتونو د استازولۍ یا یوناما په ګډون ترسره شوې، دېته موقع برابره کړي چې سیمه ییز او نړیوال پانګوال وکولی شي د افغانستان په بیارغونه او د خلکو د ستونزو په کمولو کې رغنده رول ولوبوي.»
شنونکي په دې باور دي چې اسلامي امارت د نشه یي توکو د تولید او قاچاق په ضد ریښتنې مبارزه کړې او نړیواله ټولنه باید هغو بزګرانو ته د بدیل معیشت امکانات برابر کړي چې مخکې یې عواید د نشه یي توکو له تجارت سره تړلي وو.
دوی په ورته وخت کې د دوحې پروسې د پرېکړو پلي کول هم مهم بولي او وايي، له دې سره به له نړیوالې ټولنې سره د اسلامي امارت اړیکې نورې هم پیاوړې شي.
