د خیبر پښتونخواه ایالتي حکومت د ډيورند فرضي کرښې دواړو خواوو امنیتي ستونزو ته د رسېدنې په موخه، افغانستان ته د یوه مذاکراتي ټیم لېږلو خبر ورکړی.
ایالتي حکومت د یوې اعلامیې په خپرولو سره ویلي، د خیبر پښتونخوا اعلی وزير علي امین ګڼداپور پر مشرۍ د يکشنبې پر ورځ(د سلواغې ۲۸ مه) د دې ایالت د سیاسي او مذهبي مشرانو په یوې ناسته کې په دې هوکړه شوې چې نږدې راتلونکي کې به دغه پلاوی افغانستان ته لاړ شي.
په اعلامیه کې دغه راز ویل شوي، د سیاسي او مذهبي مشرانو د استولو اصلي موخه ډیورنډ فرضي کرښې دواړو خواوو ته د امنیتي ستونزو او ترهګریزو ګواښونو پر سر خبرې او دغې ستونزې ته د حل لارو موندل دي.
د خيبر پښتونخوا اعلی وزیر د اطلاعاتو او عامه اړیکو سلاکار محمدعلي سېف وايي: « ناسته کې په دې ټینګار وشو چې د ترهګرۍ ختمولو او د امن را وستلو لپاره له افغانستان سره د حکومت پر کچه مذکرات اړین دي. په همدې موخه د سیاسي او مذهبي مشرانو په ګډون یوه جرګه باید جوړه او سملاسي دې مذاکرات پیل شي.»
د «ترهګرۍ پر وړاندې ملي اتحاد» تر سرلیک لاندې د سیاسي او مذهبي مشرانو په دې مشورتي ناسته کې چې د تحریک انصاف ګوند بنسټګر عمران خان په مشورې جوړه شوې وه، په کې افغانستان ته د پلاوي استولو کره نېټه نه ده په ډاګه شوې، خو له افغانستان سره په حکومتي کچه خبرې اترې مهمې بلل شوې دي.
د سیاسي چارو شنونکي افغانستان ته د یاد پلاوي راتګ په ټوله کې مثبت ګام بولي او وايي، د ډيورنډ فرضي کرښې دواړو خواوو ته پرتو پښتنو قومونو ترمنځ د اړیکو او همکاریو ډېرېدل او د سفرونو او جرګو جوړېدل د شته ستونزو او ننګونو په حل کې اغېزناک رول لوبولی شي.
د سیاسي چارو شنونکی واحد فقیري وايي: « که چېرې دا خلک چې دواړو غاړو ته پراته دي، په خپل منځ کې خبرې سره وکړي، سره جرګه شي او د ستونزو هوارولو لپاره لارې چارې ولټوي، زه فکر کوم چې دا یو مثبت عمل دی او باید ژر تر ژره دغه کار وشي. هرڅومره چې د دغو خلکو ترمنځ اړیکې او تماسونه ډېرېږي، په همدې کچه ستونزې کمېږي او د خلکو ترمنځ همکاري ډېریږي.»
ځينې نور بیا په ګڼو برخو کې د اړیکو ټینګښت د افغانستان او پاکستان پر ګټه بولي او ترمنځ يې د ننګونو عملي حل پر دوه اړخیزو توافقاتو پورې تړلی ګڼي.
د سیاسي چارو کارپوه عزیز معارج وايي: « د ستونزو هوارولو لپاره د تورونو لګولو پر ځای د حل لاره همدا ده چې دواړه لوري سره کېني او خبرې وکړي، خو په دې شرط چې خپلو ملي ګټو ته ژمن پاتې شي او یو بل ته قناعت ورکړي، پر عملي توافقاتو بحث وکړي او یوې پرېکړې ته سره ورسېږي.»
د ترهګریزو ستونزو د هوارولو په موخه افغانستان ته د خیبرپښتونخواه د ایالتي حکومت پر کچه د پلاوي راتګ خبره داسې مهال کېږي چې له دې وړاندې د پاکستان د ایالتونو او سرحدي سیمو د چارو وزیر امیرمقام له پاکستاني رسنیو سره مرکه کې له هېوادونو سره مذاکرات د ایالتي حکومتونو له صلاحیته پورته موضوع بللې وه.
د نوموړي په خبره، که د خیبرپښتونخوا او یا کوم بل ایالتي حکومت چارواکي د مرکزي حکومت له اجازې پرته په خپلسر مذاکرات کوي، بې ګټې او بې پایلې به وي.
