یاد ګوند پر اېکس پاڼه لیکلي، د مولانا خانزیب فکر او میراث به تل ژوندی ساتي او د هغه د مبارزې د اهدافو د تحقق لپاره به خپلې هڅې او مبارزه روانه ساتي.
یاد ګوند زیاته کړې:« که څه هم هغه نن زموږ په منځ کې نشته، خو مبارزه او هدف یې ژوندی دی. نه مرمیو او نه هم تاوتریخوالي وکولای شول هغه ارزښتونه چوپ کړي چې ده ورته مبارزه کوله. د هغه میراث او فکر به د راتلونکو نسلونو لپاره د الهام سرچینه پاتې شي.»
مولانا خانزیب د دې لارې یوازینی سرښندونکی نه و؛ تر هغه وړاندې د پښتون ژغورنې غورځنګ مخکښ او انقلابي شاعر ګیله من وزیر هم د یوې مرموزې پېښې قرباني شوی وو، داسې پېښه چې تر اوسه پورې یې د عاملینو هویت نه دی روښانه شوی.
د پښتون ژغورنې غورځنګ مشر منظور احمد پښتین د مولانا خانزیب او ګیله من وزیر د تلینونو په مناسبت په خپاره کړي تازه پیغام کې، هغوی د سولې، عدالت او انصاف د مبارزې ریښتیني اتلان بللي او د هغوی سرښندنې یې ستایلې دي.
د سیاسي چارو یو شمېر شنونکي په دې باور دي چې د پښتون ژغورنې غورځنګ او عوامي نېشنل ګوند د پښتنو د حقونو، سولې، عدالت او عدم تشدد لپاره اوږدمهاله مبارزه کړې ده.
د دوی په وینا، دغو دواړو خوځښتونو د پښتنو د سیاسي، ټولنیزو او بشري حقونو د مطرح کولو، د ناامنۍ پر ضد د غږ پورته کولو او د قانون د حاکمیت د غوښتنې لپاره مهم رول لوبولی دی.
د سیاسي چارو شنونکی عزیز معارج وايي:« پيټيایم د منظور پښتین تر مشرۍ لاندې دا یوازینی حرکت دی چې واقعا پښتانه د خپلو حقونو لپاره هڅوي او راوېښوي یې. پر پاکستاني چارواکو باندې د فشار یوه وسیله هم ده.»
په پاکستان کې ازاد خبریالان وایي، د مولانا خانزیب او ګیله من وزیر د وژنې په اړه پلټنې مرموزې دي او د عاملینو په اړه یې هم د هېڅ ډول اقداماتو څرک نه دی لګېدلی.
