له تېرو څو ورځو راهیسې په خيبرپښتونخوا کې د خواله رسنیو له لارې د پاکستان پوځ پر ضد غبرګونه پيل شوي او له ځايي اوسېدونکو غوښتل شوي چې هر ډول اړیکې ورسره پرې کړي.
د پښتون ژغورنې غورځنګ مشر ته نږدې د خواله رسنيو ځينو ادرسونو کې ويل شوي، په پښتون مېشتو سيمو کې پاکستان پوځي جنرلانو جګړه د روزګار وسيله ګرځولې او اوس هغه وخت را رسېدلی چې ټول پښتانه له پاکستان پوځ سره جدي پرېکون اعلان کړي.
د پاکستان تر کنټرول لاندې سیمو کې د پښتنو پر وړاندې د پوځ روان زور زیاتي ته په کتو، د چارو څارونکي بیا وایي، هلته مېشت پښتان نور باید د پاکستان پوځ پر وړاندې غلي پاتې نهشي.
د پوځي چارو شنونکی توریالی ځاځی وايي: « په کوزې پښتونخوا کې د خلکو پر وړاندې د پاکستاني جنرالانو جنایت هغه مهال پيل شو چې دوی د عدم تشدد تر نامه لاندې مبارزه پيل کړه. اوس هم د پښتونخوا ۳۷ سلنه خلک د پاکستان په پوځ او استخباراتو کې دنده لري.»
د سیاسي چارو شنونکی خلیل احمد نادم وايي: « اوس اړتیا ده چې پښتانه او بلوڅان راپورته شي او د پنجابي پوځ په مقابل کې ودرېږي، ترڅو خپل حق ترلاسه کړي او وینه تویېدنه ودرېږي.»
په ټولنیزو رسنیو کې منظور احمد پښتين ته منسوب ادرسونه لیکلي، پاکستان پوځي رژيم په خبیرپښتونخوا کې جګړه د روزګار د وسيلې په توګه کاروي او خپلې ګټې ورته لومړيتوب لري.
دې ادرسونو د پښتین له دریځه په الهام د پاکستان پوځ کې پر دنده لرونکو پښتنو غږ او سپارښتنه کړې چې د ځان او خپلو ماشومانو خوندي ساتلو لپاره هر ګام په پوره فکر او تدبیر سره واخلي او خپل ځان خوندي وساتي.
د پوځي چارو څارونکي بیا وایي، په پاکستان کې له روان امنیتي، اقتصادي او سیاسي وضعیت داسې ښکاري چې د دې هېواد سیاسي جوړښت د شړېدو په لور روان دی.
د پوځي چارو څارونکي اخترمحمد راسخ وايي: « اوس پښتنو پر خپل وطن د حاکمیت خپلولو باندې پیل کړی او د پاکستاني جنرالانو د هغو کړنو او پلانونو د پلي کولو په درشل کې دې ټکي ته ورسېدل چې نور باید د پاکستان پر وړاندې د ټوپک او جګړې لاره خپله کړي، ترڅو د هغو جګړو مخه ونیول شي چې پاکستان په دغو سیمو کې پلان کړې دي.»
د پاکستان پوځي رژیم په دې وروستیو کې یو ځل بیا د خیبرپښتونخوا په ګڼو سیمو کې د ترهګرۍ ځپلو په پلمه پوځي عملیات پیل کړي چې په ترڅ کې يې ولسي خلک له مالي او ځاني اړخه زیان شوي دي.
د دغو عملیاتو په ضد هره ورځ ولسي او سیاسي غبرګونه ښودل کېږي، خو لا هم د پاکستان پوځ دا عملیات نه دي درولي.
