د خوړو نړیوال پروګرام: له تاجکستانه مو افغانستان ته د بشري مرستو لېږد پیل کړی

تاجکستان کې د خوړو نړیوال پروګرام چارواکو ویلي، پرون د دې بنسټ اووه لارۍ خوراکي توکي د افغانستان پر لور روان شوي دي او هڅه کېږي، له دې وروسته د تاجکستان له خاورې افغانستان ته د خوراکي توکو د لېږد په موخه کار واخېستل شي.

تاجکستاني چارواکو هم ویلي، دوی له نړیوالو بنسټونو سره افغانستان ته د خوراکي توکو او بشردوستانه مرستو د لېږد په برخه کې همکاري کوي او دا د دې همکاریو د لړۍ پيل دی.

د خوړو نړیوال پروګرام تر دې وړاندې ویلي وو، له تاجکستان سره یې خبرې پيل کړي،ترڅو بشردوستانه مرستې له دې لارې افغانستان ته ولېږدول شي.

نړیوال بنسټونه وايي، د بشردوستانه مرستو په لار کې یې تر ټولو ستر خنډ د ترانزیتي لارو تړل کېدل او په هوايي ډګرونو کې ستونزې دي.