Skip to content
د ملګرو ملتونو د خوړو پروګرام وايي، د لویدیځو او اروپايي هیوادونو ترڅنګ اسیايي هېوادونه او په ځانګړې توګه افغانستان هغه نقطې دي،چې د اوکراین کړکېچ زیانمن کړي او لا نور یې هم ځپي.
د یاد پروګرام ویانده شېلي تکرال وايي، افغانستان کې به د خوراکي توکو او تېلو بیې نورې هم لوړې شي.
شېلي تکرال زیاتوي:«د اندیښنې وړ موضوع دا ده،چې د اوکراین کړکیچ نورې هغې نقطې هم زیانمنې کړې دي،چې له پخوا راهیسې د افغانستان په څېر د اقتصادي ناورین په درشل کې دي. هلته به د خوړو او تېلو بیې نورې هم لوړې شي.»
تکرال وايي، د ملګرو ملتونو په مرسته تر دې دمه میلیونونو افغانو کورنیو سره مرسته شوې، خو میلیونونه اضافي پیسو ته هم اړتیا لیدل کېږي.
تکرال زیاته کړه:« په تېرو اتو میاشتو کې په افغانستان کې د خوړو بیې نږدې ۴۰ سلنه پورته شوي دي. د خوړو نړیوال سازمان سږ کال یو میلیارد ډالر لګښت وکړ،چې میلیونونه افغانانو ته خوراکي توکي ورسوي،خو اوس هم د دې بهیر لپاره ۱.۶ میلیارده ډالرو ته اړتیا شته دی.»
د خوړو نړیوال سازمان ویاندې، په راپور کې دا هم ویلي، د روانې میاشتې په وروستیو کې به له افغانستان سره د څلورو میلیاردو ډالرو مرسته هم اعلان شي.
هغه زیاتوي:« د روانې میاشتې په پای کې به په بریټانیا کې د مرستې غوښتنې یوه غونډه جوړه شي،چې ۴.۴ میلیارده ډالرو مرستې غږ وکړي. دغه پیسې به په افغانستان کې له بشري ناورین سره د مبارزې په برخه کې ولګول شي.»
شېلي تکرال اندیښنه څرګنده کړې ده،چې د افغانستان د څه باندې ۳۵ میلیونه وګړو ۹۵ سلنه کافي خواړه نه لري او د خوړو اخیستو لپاره نغدې پیسې هم نه لري.
