اوس د طالبانو خواخوږي هم د سولې پروسې لپاره د ولسمشریزه ټاکنو ځنډ غواړي.
د خلاصون لار شورا غوښتنه وکړه چې د سولې لپاره دې ولسمشریزې ټاکنې وځنډول شي.
دې شورا د سولې لپاره د امریکا د بهرنیو چارو وزارت له استازي هم غوښتنه کړې چې له داسې خلکو سره دې د سولې پروسې په تړاو خبرې وکړي چې بانفوذه وي.
د خلاصون لار شورا مشر د سولې پروسې د بریالیتوب لپاره د طالب بندیانو خوشې کیدل او د قطر دفتر په رسمیت پيژندل اړین یادوي.
د سولې لپاره چې اوس تر بل هر وخت تمې زیاتې شوي، ورسره یو ځای وړاندیز کیږي چې ولسمشریزه ټاکنې دې وځنډیږي، که څه هم افغان حکومت په ښکاره ویلي چې ټاکنې به په خپل وخت کیږي، خو ټینګار دا دی چې که سوله راځي، ټاکنې دې وځنډیږي.
د خلاصون لارې شورا وایي، په هېواد کې خاموشه اکثریت د دریمګړي رول لوبولی شي، نو په کار ده چې د لیدو او مشورو پرمهال له پامه و نه غورځول شي.
طالبانو د مسکو په ناسته کې د دفتر د رسمیت پیژندلو او د مشرانو په سر د ټاکل شو جایزو او د تور لیست لرې کولو غوښتنه کړې، چې د خلاصون لارې شورا پرې هم ټینګار لري.
د خلیلزاد سفرونه او هڅې دا په ډاګه کوي چې نړیوال او په ځانګړي ډول امریکا غواړي، نور په افغانستان کې جګړه پای ته ورسوي.
قطر کې له طالب استازو سره د امریکايي استازو لیدنې او د مسکو غونډه هغه څه دي چې د سولې لپاره هیلې زیاتې کړي دي.
