د افغانستان په اړه د نړۍ پرمختللو صنعتي هېوادونو یا جي شل دوه ورځینۍ ناسته پای ته ورسېده او غړیو هېوادونو له افغانانو سره د بشري مرستو د لېږد پر سر بحثونه وکړل او مهمې پرېکړې پّه کې وشوې.
ناسته کې غړیو هېوادونو ټینګار کړی،چې نړۍ دې افغان ولس یوازې نه پرېږدي او د افغانستان اوسنی وضعیت باید بابیزه ونه ګڼل شي.
د جرمني لومړۍ وزیره انګیلامیرکل،چې څو ورځې وروسته یې د واک دوره پای ته رسیږي وویل، نړیواله ټولنه باید افغانان پر خپل حال پرېنږدي.
مېرکل زیاته کړه:« دا موږ ته هېڅ ګټه نه کوي،چې په افغانستان کې مالي سیستم له منځه ولاړ شي. که داسې وشي،نو افغانستان ته به بشري مرستې ونه رسېږي. دا اسانه نه ده،چې موږ یوازې خبرې کوو او ۴۰ میلیونه کسان په بدمرغۍ کې پریږدو. دا د نړیوالې ټولنې موخه نه ده.»
دراګي زیاتوي:« موږو اوس باید بشري ناورین ته رسېدنه وکړو. دا زموږ لومړیتوب دی. که دې برخه کې اړیکو ته اړتیا وي،موږ باید له طالبانو سره اړیکې ونیسو، ځکه اوس تر دې پرته بل بدیل نشته او بله لار اغیزمنه هم نه ده.»
هغه وايي، له طالبانو سره اړیکې په دې مانا نه دي،چې د هغوی حکومت پر رسمیت پیژندل کیږي او په خبره یې د رسمیت پیژندو لپاره نړیوالې ټولنې ته یو شمیر معیارونه اړین دي.
دراګي زیاتوي:« زموږ دا اړیکې د رسمیت پیژندلو په مانا نه دي، لکه څرنګه چې ما وویل،د رسمیت پیژندلو موضوع یوه سیاسي موضوع ده او د هغې لپاره نړیوالې ټولنې یو لړ اصول او معیارونه په پام کې نیولي دي. بشري حقونو او د ښځو حقونو ته درناوی وشي او د انجونو زده کړې دوام پیدا کړي. خو د دغو معیارونو عملي کولو کې تر اوسه پرمختګ نه دی لیدل شوی.»
په ورته وخت کې د جي شل هېوادونو په غونډه کې له افغانستان سره د نویو مرستو ژمنه هم وشوه،چې تر ډیره به خوراکي توکي او لومړنیو اړتیاو وړ توکو ته ځانګړې وي. اروپايي ټولنې په دغې ناسته کې اعلان وکړ،چې له افغانستان سره یې د خپلو بشري مرستو کچه له درې سوه میلیونه یورو څخه یو میلیارد ته پورته کړې ده.
