د ننګرهار ولایت مرکز جلال آباد ښار اوسېدونکي وايي، که څه هم ښاروالۍ د ښار په بېلابېلو سیمو کې د بیا رغونې لسګونه پروژې پیل کړې دي، خو ټینګار کوي چې د دغو پروژو پر کمیت سربېره دې کیفیت ته هم پاملرنه وشي.
دوی شکایت کوي چې ډېری تطبيق شوې پروژې له وخت وړاندې بېرته ویجاړې شوې او همدارنګه ښاریانو لپاره هغسې خدمات نه وړاندې کېږي چې ورته اړتیا ده.
د جلال آباد ښار یو تن اوسېدونکی وايي: « پروژې بې کیفیته پلې کېږي، په دې مانا چې دوه درې میاشتې وروسته خپل کیفیت له لاسه ورکوي، سیمنټ یې چوي او سړکونه د کارولو وړ نه وي. کله چې بارانونه کېږي، د جلاآباد ښار په سړکونو اوبه را روانې او ډندې وي، زموږ د دوکانونو مخې ته اوبه راځي. نو د صفايي او یوه منظم کانالیزاسیون په برخه کې ښاروالۍ هېڅ اقدام نه دی کړی او که کړی یې هم وي، داسې ګام نه دی چې د جلال آباد ښار لپاره کافي وي.»
د جلال آباد یو بل اوسېدونکی وايي: «موږ وایو، دوی باید نور هم کوشش وکړي چې د دې سړکونو، سنګکاریو معیار ته پام وشي او ښه یې جوړ کړي، ترڅو څو میاشتې او کالونه کار وکړي.»
خو د جلال آباد ښاروالۍ مسوولین بیا وايي، دوی د ښاریانو ستونزو ته پر وخت رسېدنه کړې او له خپلو امکاناتو سره سم په دې بریالي شوي چې د نورو کارونو ترڅنګ، په دوو کاري شیفټونو کې هره ورځ لسګونه ټنه کثافات هم له ښاره راټول کړي.
مسوولین زیاتوي، له ښاره د اوبو ایستلو پرمنظم سیسټم جوړولو کار روان دی او همدارنګه پر هغو پروژو د کیفیت ډاډمنتیا لپاره وخت پر وخت څارنه کېږي چې دا مهال یې کارونه روان دي.
د جلال آباد ښاروالۍ ویاند بختي جان مراد وايي: « هره مرحله چې په پروژه کې مخته ځي، ترې څارنه او نظارت کوي، د دې ترڅنګ دغه پروژې یو کال موده لري او باید د یوه کال په موده کې که هر ډول نواقص راپېښ شي، مسوول شرکت یا قراردادي مکلف دی چې بېرته یې له سره جوړ کړي.»
په ورته وخت کې مراد وايي،، په تېرو درېيو کالو کې یې له خپلو عوایدو له ۱۲۰ زیاتې پروژې پلي کړې دي.
د مراد په خبره، د دغو پروژو پر پلي کولو ۸۰۰ میلیونه افغانۍ لګښت راغلی او زرګونه کسانو ته په کې په مستقیم او غیرمستقیم ډول کاري فرصتونه برابر شوي دي.
هغه په دې اړه وايي: « له ۱۲۰ زیاتې انکشافي او پراختیايي پروژې مو پلي کړې دي چې په کې د سړکونو جوړول دي، د سړکونو قیر او کانکرېټ ریزي ده، د کوڅو جوړول دي، د پلونو او پلچکونو جوړول دي، همدارنګه د تفریحي پارکونو جوړول دي. په دغو پروژو ۸۰۰ میلیونه افغانۍ لګښت راغلی چې ټول د جلال آباد ښاروالۍ له داخلي عوایدو ورکول شوي دي.»
جلال آباد ښاروالۍ په خپلو عوایدو د دې پروژو د پلي کولو خبره داسې مهال کوي چې تازه یې د ۳۷ میلیونو افغانیو په لګښت د ښار په نهمه ناحیه کې د دوو سړکونو د رغولو چارې پیل کړې دي.
