تخار ولایت کې د کوکچې سیند پر څنډو پرتو څلور سرحدي ولسوالیو اوسېدونکي وایي، له مرکزه ورغځېدلي سړکونه خام پاتې دي، روغتیايي مرکزونو، مخابراتي شبکو او د څښاک پاکو ته محدود لاسرسی هغه څه دي چې د دې ولایت د سرحدي ولسوالیو اوسېدونکي یې له ګڼو ننګونو سره مخ کړي دي.
د دې ولسوالیو له ډلې د خواجه بهاوالدین ولسوالۍ خلک له مرکز په بېلابېلو برخو کې د مرستې غوښتنه کوي.
دوی شکایت کوي چې هلته شته روغتیايي مرکز د دوی اړتیاوې نه شي پوره کولی او اړ دي چې خپل ناروغان تالقانو ښار ته ولېږدي، خو د لارې د اوږدوالي او خرابوالي له امله ډېر کله ناروغان په لارو ژوند بایلي.
د خواجه بهاوالدین ولسوالۍ یو تن اوسېدونکی وايي: «تخار ته د تګ راتګ پرمهال له ګڼو ستونزو سره مخامخ یو. لاره خرابه ده او په ځانګړې توګه ناروغان په ډېرې سختۍ تر مرکزه لېږدوو. د جمهوریت په وخت کې نا امني وه، خو له ا سلامي امارت غوښتنه کوو چې اوس امنیت ښه دی او زموږ دا سړک دې ورغوي.»
همدارنګه د دې ولسوالۍ یو تن بل اوسېدونکی هم ورته غوښتنه لري: « تېرو ۲۰ کالو کې د کوکچې څنډو کې پرتو ولسوالیو ته پاملرنه نه ده شوې. په ځانګړې توګه سړکونه ډېر خراب دي او ناروغان تالقانو ښار ته له رسېدو وړاندې په لارو ساه ورکوي.»
د خواجه بهاودین ولسوالۍ ځینې نور اوسېدونکي بیا د برېښنا، څښاک پاکو اوبو او مخابراتي شبکو په تړاو هم شکایتونه لري او وايي، چارواکي باید رسېدنه وکړي.
د عبدالروف په نوم د خوجه بهاوالدین ولسوالۍ یو تن اوسېدونکی وايي: « د خرابو سړکونو ترڅنګ برېښنا هم نه لرو، د څښاک پاکې اوبه نه شته او مخابراتي شبکې خورا کمزوې دي. له دولت غوښتنه کوو چې زموږ ستونزې هوارې کړي.»
ځايي چارواکي هم د خلکو ستونزې پرځای بولي او وایي، ستونزې یې له مرکز سره شریکې شوې خو لا یې مثبت ځواب نه دی ترلاسه کړی.
د خواجه بهاوالدین ولسوال مولوي عبدالصمد اشرف وايي: « د دې ولسوالۍ د خلکو ستونزې ډېرې دي خو لویه ستونزه د ولسوالۍ او مرکز تالقانو ترمنځ د غځېدلي سړک خرابي ده. په دې اړه مو څو ځله ولایت مقام او ټولګټو وزارت ته پېشنهادونه کړي، خو له بده مرغه تر اوسه پاملرنه نه ده شوې. دا خلک د څښاک پاکو اوبو او کانال په اړه هم له ستونزو سره مخ دي. له ټولو اړوند سکټورونو غوښتنه لرو چې زموږ د خلکو ستونزو ته د حل لارې پیدا کړي.»
تخار ولایت ۱۶ ولسوالۍ لري چې ځینې یې خورا وروسته پاتې او عامه خدمتونه په کې کمزوي دي. دغو ولسوالیو ته د تېرو حکومتونو پرمهال هېڅ ډول پاملرنه نه ده شوې او تر ډېره یې پړه پر نا امنیو اچول شوې ده.
د دې ولسوالیو خلک د امنیت په راتګ سره د بیا رغنیزو پروژو غوښتنه کوي.
