له تېرې شنبې ورځې راهيسې يوازې د تورخم له لارې له پاکستان څخه تر ۲ زرو زیات کسان په زور را ایستل شوي دي.
دا شمېر کسان د خيبرپښتونخوا او پاکستان په بېلابېلو ښارونو کې د پوليسو له لوري نيول شوي او بیا افغانستان ته اړول شوې دي.
ځينو کډوالو شمشاد ته په لېږلو وېډيو کلېپونو کې ادعا کړې چې د اخراج پرمهال پاکستاني ځواکونو اجازه نه ده ورکړې چې د خپل کور وسايل له ځان سره هېواد ته ولېږدوي.
له پاکستان را ایستل شوی یو تن افغان کډوال وايي: « یوازې دوه بکسونه او د غاړې جامې یې راکړې، نور ټول سامانونه یې رانه وګرځول. زه نورو کسانو ته وایم چې په پاکستان کې اور ور واچوئ خو له ځان سره یې تورخم ته مه راوړئ. په تورخم کې پاکستاني پولیس وايي، دا وسایل تاسو له افغانستانه نه دي راوړي، بلکې دا زموږ دي او دلته به پاتې کېږي.»
په زور د افغان کډوالو اخراج او ورسره ناوړه چلن نړيوال سازمانونه غبرګون ښودلو ته اړ کړي او په دې لړ کې د بښنې نړيوال سازمان د يوه تازه کمپاين له لارې له پاکستانه غوښتي چې افغان کډوالو ته د ستنېدو مهلت وغځوي.
دې سامازمان په خپل کمپاين کې د هغو افغانانو يادونه کړې چې په خبره يې له پاکستانه تر ایستل کېدو وروسته ښايي د مرګ له ګواښ سره مخ شي.
د بښنې نړيوال سازمان دې او دېته ورته نورو حساسيتونو ته په کتو له پاکستانه د افغانانو د ايستلو پلان غير اصولي بللی او د لغوه کولو غوښتنه يې کړې.
د بښنې نړیوال سازمان زیاته کړې: « وروسته له هغې چې پاکستاني چارواکو په دې هېواد کې د مېشتو افغانانو چې په کې کډوال او پناه غوښتونکي هم شامل دي، د جبري اېستلو نوې لړۍ پیل کړه، د بښنې نړیوال سازمان د مهلت د بېرته غځولو کمپاین پیلوي. دا کمپاین «له موږ سره د انسان په توګه چلن وکړئ» تر شعار لاندې پیل کېږي.»
پاکستان د تېرې مارچ میاشتې ۳۱مه نېته د افغان تابعیت کارت (اې.سي.سي) لرونکو افغانانو ته وخت ورکړی و چې په داوطلبانه توګه له پاکستان ووځي.
خو اوس يې د دې مهلت په پوره کېدو سره په زور د افغانانو د ايستلو لړۍ پيل کړې ده.
افغان کډوال د پاکستان د پولیسو له لوري ورسره کېدونکي چلن سختې نیوکې لري او وايي، له دوی سره کېدونکی چلن انساني نه دی.
له پاکستانه راستون شوی افغان کډوال سید جمال شاه میاخېل وايي: « دا ډېره بې رحمي ده او د اسلام خلاف کار دی. موږ غواړو هغه شان بېرته خپل هېواد ته ستانه کړای شو لکه څرنګه چې راغلي یو. موږ افغانستان ته په تګ خوښ یو، خو باید وخت راکړل شي.»
د پاکستان ترڅنګ ایران هم د افغان کډوالو شړلو لړۍ تېزه کړې ده.
د ایران انتظامي ځواکونو قوماندانۍ ویاند ویلي، په ۱۴۰۳ کال کې یې یو میلیون او ۱۲۰ زره افغان کډوال چې د دې هېواد چارواکي یې غیرمجاز بهرني اتباع بولي، د ایران له خاورې ایستلي دي.
د سیاسي چارو کارپوهان وایي، پاکستان او ایران افغان کډوال د سیاسي وسایلو په توګه کاروي او په خبره يې له دې لارې هڅه کوي چې خپلې سیاسي موخې تعقيب کړي.
د سیاسي چارو شنونکی عبدالصادق حمیدزوی وايي: «زموږ ګاونډیان خپلو اهدافو او ستراتیژیو ته د فشارونو له لارې یا هم د خوږ ګوتې نیولو له لارې ځان رسوي. زه پر ټولو افغانانو غږ کوم چې خپل وطن ته راشي؛ ځکه که ګور تنګ دی، د مړي ورته ناکام دی.»
دا په داسې حال کې ده چې تېره ورځ د ملګرو ملتونو د کارپوهانو ډلې هم د افغان کډوالو د جبري ایستلو په غبرګون کې د پاکستان له حکومته وغوښتل چې د دې پروګرام له عملي کولو دې ډډه وکړي.
هغوی د افغان کډوالو د جبري ستنولو په تړاو اندېښنه څرګنده کړې او ټینګار یې کړی چې پاکستان باید د افغان کډوالو د کوربه په توګه خپل اوږدمهالي رول ته دوام ورکړي.
