Skip to content
وروسته له هغه چې د بریټانوي هوایي ځانګړو ځواکونو په تړاو یو راپور خپور شو،چې په کې د یادو ځواکونو جنګي جنایتونه په ډاګه شوي ول، د بښنې نړیوال سازمان دغه راپور ته غبرګون ښودلی او د دغو تورونو د څېړنو غوښتنه یې کړې،چې په خبره یې سرغړونکو سره حساب وشي.
د بښنې نړیوال سازمان د راپور یوه برخه:« د بښنې نړیوال سازمان افغانستان کې د ماموریت پر مهال د بریتانیا ځانګړو ځواکونو خلاف د لګول شویو تورونو په اړه کارنده او رڼې څېړنې غواړي،چې قربانیانو سره عدالت او سرغړوونکو سره حساب وشي.»
د بښنې نړیوال سازمان دا د بریټانیا مسوولیت ګڼلی دی،چې د خپلو ځواکونو په تړاو پلټنه وکړي.
د بښنې نړیوال سازمان د راپور یوه برخه:« بریټانیا مکلفه ده،چې سملاسي د دوی پر ځانګړو ځواکونو د جنګي جنایتونو د لګېدلو تورونو په اړه څېړنې پیل کړي او هر بریټانوي وګړی چې فردي جرمي مسوولیت ورګرځي، باید بریټانیا کې د عدالت میز ته کېنول شي.»
د بښنې نړیوال سازمان ویلي،که بریټانیا د خپلو ځواکونو د سرغړونو لېواله نه وي، نو د جنګي جنایتونو نړیواله محکمه دې دا کار وکړي.
د بښنې نړیوال سازمان د راپور یوه برخه:« که بریټانیا د خپل پوځ خلاف د قضیو پرانېستلو ته لېواله نه وي، هغه څه چې یې عراق کې د خپلو ځواکونو لخ خوا د ترسره شویو جنګي جنایتونو په اړه په بې شرمۍ سره وښودل، د جنګي جنایتونو نړیواله محکمه باید دا کار وکړي.»
افغانستان له ۲۰۰۳ زېږدیز کال راهیسې د جنایتونو نړیوالې محکمې غړېتوب لري، بریټانیا په ۲۰۰۱ زېږدیز کال کې د روم اساس نامه تصویب کړې،چې له مخې یې د جنایتونو نړیواله محکمه کولای شي، په دواړو هېوادونو کې د جنایتونو پلټنه وکړي.
