د بښنې نړیوال سازمان:د افغان ښځو شل کلنۍ لاسته راوړنې له ګواښ سره مخ دي

د بښنې نړیوال سازمان پر نړیوالو غږ کړی دی،چې د افغان ښځو او نجونو د حقونو په تړاو انعطاف ونه ښيي.

دغه سازمان ویلي،د واقعیتونو د لا ښه درک او پوهیدا په خاطر باید د ښځو د حقونو له فعالانو سره مشورې وشي او د ښځو د حقونو د ملاتړ لپاره باید افغانستان کې کار وشي.

د دې سازمان بله غوښتنه په افغانستان کې د ښځو د حقونو د پرمختیایي پروژو او پروګرامونو د پلي کولو لپاره د بودیجې تخصیص دی.

یاد سازمان ویلي،چې نړیوالې ټولنې په افغانستان کې د ښځو د حقونو د ملاتړ لپاره ژمنې کړي،خو اوس د دغو ژمنو د عملي کولو وخت دی.

د بښنې نړیوال سازمان له ټولو غوښتي دي،چې دغه غوښتنلیک لاس لیک کړي.

د بښنې نړیوال سازمان په داسې مهال د افغان ښځو شل کلنې لاسته راوړنې له ګواښ سره مخ بللي،چې تازه د اسلامي امارت رئیس الوزرا ملا محمد حسن اخند پر خپله لومړنۍ وینا کې وویل،نوي حکومت د ښځو حقونه او د هغوی  ابرو ساتلې او هڅه کوي په اسلامي  چوکاټ کې ورته د زدکړو زمینه برابره کړي.