د بهر مېشتو افغانانو مشورتي جرګې غړیو د سه شنبې پر ورځ د (۱۴۰۴ کال د غويي پر ۲ مه) له شمشاد ټلوېزيون او اومر ماين پاکۍ موسسې ليدنه وکړه
د دې جرګې غړیو د شمشاد ټلوېزيون مسوولينو، ژونالېستانو او کارکونکو سره د لیدنې پر مهال په رسنیز ډګر او په بې پرې توګه په اطلاع رسونې کې د دوی هڅې وستايلې.
د یادې جرګې مشر نور عالم حکيميار وايي: « شمشاد هغه یوازینی ټلویزیون دی چې د افغانستان کلتور، بډایه تاریخ او ملي شخصیتونو ته ریښتینی پاتې شوی. دوی په خپلو خپرونو او رسنیزو فعالیتونو کې د افغانستان حقایق نړۍ او افغانانو ته وړاندې کوي. دا ښکاره خبره ده چې افغانستان کې د ژورنالېستانو لپاره کار هېڅکله اسانه نه و، خو د شمشاد ژورنالېستانو ځانونه د افغانستان لرې پرتو سیمو ته رسولي او هلته یې خپرونې جوړې کړې. ما ته د دوی ټولې برنامې د افغانستان د خلکو پر ګټه ښکاري.»
دغه راز حکیمیار د اومر ماين پاکۍ موسسې فعاليتونه، د افغانانو او په ځانګړي ډول د ښځو او ماشومانو د ژوند ژغورنې په برخه کې د قدرداني وړ وبلل.
هغه زیاته کړه:« اومر موسسه هم د هغو افغاني موسساتو له ډلې ده چې په افغانستان کې یې ډېر خدمت کړی، د ډېرو افغان ماشومانو، ښځو او نرانو ژوند یې ژغورلی.»
د بهر مېشتو افغانانو مشورتي جرګې غړیو له دې وړاندې هم د سرپرست حکومت له چارواکو سره په لیدنو کې د باور جوړونې، همکارۍ او خلکو ستونزو ته د حل روښانه چوکاټ رامنځته کېدو پر اړتیا خبرې کړې دي.
د بهر مېشتو افغانانو د مشورتي جرګې غړی عبداللطیف متين په دې اړه وايي: « له موږ سره چارواکي ډېره همکاري کوي. زما لپاره جالبه دا وه چې هغه دردونه او اندېښنې چې موږ یې لرو، دوی یې هم لري. دوی له موږ سره مطلق همغږي دي او زموږ غوښتنو ته یې غوږ نیولی او تمه لرو چې عمل پرې وکړي. څرنګه چې له حکومتي چارواکو سره په یوه مجلس کې یاده شوه، دا ده چې رڼا شته او د روښنايي په طرف روان یو، خو ممکن دغې رڼا ته رسېدل وخت واخلي.»
د دې جرګې غړیو له دې وړاندې د سرپرست حکومت له مختلفو ادارو مشرانو سره کتلي او خپلې ستونزې او مشورې یې ورسره شریکې کړې دي.
