د بهرنیو چارو وزارت سرپرست مولوي امیرخان متقي د «تهران خبرو اترو فورم» کې له ګډون وروسته په رسمي سفر د چین پلازمېنې بېجینګ ته تللی دی.
بهرنیو چارو وزارت په دې اړه خپرې کړې خبرپاڼه کې ویلي، متقي د دې سفر په لړ کې د افغانستان، چین او پاکستان د بهرنیو چارو وزیرانو درې اړخیزې درې ورځنۍ ناسته کې د ګډون ترڅنګ له خپل چینايي سیال سره پر دوه اړخیزه ناسته کې د دواړو خواوو ترمنځ د سیاسي، اقتصادي او سوداګریزو اړیکو پر پیاوړتیا خبرې وکړې.
دغه درې اړخیزه ناسته د سه شنبې پر ورځ پیل شوې.
د خبرپاڼې یوه برخه: « په پام کې ده چې د هېواد بهرنيو چارو وزير به له خپل چينايي سيال ښاغلي وانګ يي سره پر دوه اړخيزو سیاسي، اقتصادي او تجارتي اړيکو د خبرو ترڅنګ، د چين او پاکستان د بهرنيو چارو وزيرانو سره په مشترکه ناسته کې هم خبرې ولري.»
د پاکستان لومړي وزیر مرستیال او د بهرنیو چارو وزیر محمد اسحاق ډار هم د دوشنبې په ورځ چین ته تللی، تر څو په یاده درې اړخیزه ناسته کې ګډون وکړي چې د بحث اصلي محور یې سیمه ییز امنیت او سوله ده.
دغه ناسته د درې اړخیزو ګټو اړوند موضوعاتو په برخه کې د ګډو همکاریو او خبرو اترو د پیاوړتیا هڅه هم بلل شوې چې د یادو مواردو ترڅنګ په کې پر ترهګریزو اندېښنو، بنسټیزې پراختیا، د سیمه ییزې سوداګرۍ پر ودې او د امنیتي او اقتصادي همکاریو پر پیاوړتیا هم بحثونه کېږي.
د سیاسي چارو شنونکی مرتضی مطهري وايي: « چین په تېرو درېیو کالو کې تل د افغانستان له خلکو او د اسلامي امارت له حکومت سره ښې اقتصادي اړیکې لرلې او دغه همکارۍ به د بهرنیو چارو وزارت مقام په سفر سره لا پیاوړې شي. موږ له نړۍ سره د اسلامي امارت د لا ډېرو اړیکو جوړېدو غوښتنه کوو. په ځانګړې توګه، هرڅومره چې د افغانستان اسلامي امارت او ګاونډیو هېوادونو ترمنځ اړیکې ښې شي، موږ به په افغانستان کې د لا ښه اقتصادي او سیاسي وضعیت لیدونکي اوسو.»
ځینې نور بیا له سیمې او ګاونډ سره د ډېپلوماټیکو او سیاسي اړیکو د جوړولو په موخه د سرپرست حکومت وروستۍ هلې ځلې ستايي او د ډېپلوماسۍ له لارې د ملي ګټو خوندي کول د بهرنیو چارو وزارت له اصلي دندو بولي.
دوی په بېجینګ کې د افغانستان، چین او پاکستان ترمنځ د درې اړخیزې ناستې جوړېدل د درې واړو خواوو ترمنځ د اړیکو په رغښت او د واټنونو راکمولو په موخه مهم ګام بولي.
د سیاسي چارو شنونکی فیضمحمد ځلاند وايي: « د بهرنیو چارو وزارت دنده همدا ده چې ډېپلوماسي وکړي او له دې لارې د خپل هېواد یا نورو هېوادونو ملي ګټې خوندي کړي او په لویه کې د سیمې او نړۍ په ګټو کې خپلې ګټې را ونغاړي. دا چې په چین کې د افغانستان، پاکستان او چین ترمنځ درې اړخیزه ناسته کېږي، دا یو مهم ګام دی او د دغو درېیو هېوادونو ترمنځ به اړیکې ورغوي، شته واټن به راکم کړي او په لویه کې به په سیمه کې همکارۍ لا پياوړې کړي.»
د افغانستان، چین او پاکستان ترمنځ درې اړخیزه ناسته داسې مهال ترسره کېږي چې له دې وړاندې د روانې مې میاشتې پر ۱۰ هم په کابل کې د افغانستان د بهرنیو چارو سرپرست او افغانستان لپاره د پاکستان او چین ځانګړو استازو ترمنځ درې اړخیزه ناسته ترسره شوې وه.
په دې ناسته کې د نورو مواردو ترڅنګ درې واړو اړخونو په راتلونکي کې د بهرنیو چارو وزیرانو د ګډې ناستې په جوړېدو سلا شوي وو.
