له هغې وروسته چې د هند تر کنټرول لاندې جمو او کشمیر په پهلګام سیمه کې پر سیلانیانو برید وشو، دغې پېښې د هند او پاکستان ترمنځ ترینګلتیا پراخه او ان تر دې ورسوله چې نوی ډیلي پر اسلام باد د برید ګواښونه کوي.
اوس مهال د دواړو هېوادونو ځواکونه د جګړې لپاره لومړۍ درجه احضاراتو کې دي.
دلته په کابل کې بیا اندېښنې دا دي که چېرې د دغو دوو سیمه ییزو اټومي قدرتونو ترمنځ جګړه ونښلي، نو نه یوازې د سیمې ثبات او امنیت ته به زیان ورسوي بلکې افغانستان به ترې هم اغېزمن شي.
د بهرنیوچارو وزارت د سټراټیژیکو مطالعاتو مرکز رئیس ولي الله شاهین وايي: « که د دې دواړو اټومي قدرتونو ترمنځ دا جګړه وشي، د تباهۍ حد یې هېچاته هم نه ښکاري. موږ په سیمه کې د سیمې د ثبات لپاره نه غواړو چې دا دوه هېوادونه له یوبل سره جګړه وکړي. دا جګړه سیمه بې ثباته کوي او په دویم ګام کې د افغانستان ولس هم له دې مسایلو متضرر کېږي. همدا اوس په واګه بندر کې زموږ تجارتي اموال بند دي.»
په ورته مهال د اسلامي امارت د بهرنیو چارو وزارت د سټراټیژیکو مطالعاتو مرکز پر سیمه او په ځانګړې توګه پر افغانستان د هند او پاکستان ترمنځ د اړیکو ترینګلتیا د پراخېدو پراغېزو علمي بحث او سیمینار جوړ کړی و.
په دغې سیمینار کې پر دې بحث شوی، که د نوي ډيلي او اسلام اباد ترمنځ جګړه وشي، سیمه به بې ثباته کړي او د دواړو هېوادونو ګاونډیان به هم اغېزمن کړي.
په سیمینار کې ټینګار شوی چې باید دواړو هېوادونه رامنځته شوې ستونزه د خبرو له لارې حل کړي.
د بهرنیوچارو وزارت د سټراټیژیکو مطالعاتو مرکز رئیس ولي الله شاهین په دې اړه وايي:« د سټراټيژيکو مطالعاتو مرکز په دې اړه یو سیمینار درلود او په کې د دې احتمالي بحران د حل یا لا ستونزمن کېدلو په ټولو لارو چارو بحثونه وشول. د ګډون کوونکو لیدلوری دا و چې جګړه د هېڅ هېواد لپاره ګټه نه لري او د افغانستان په ګډون د سیمې هېوادونه باید د دې جګړې له پېښېدو مخه ونیسي.»
په ورته مهال، د بهرنیوچارو وزارت لومړی سیاسي رییس مفتي نوراحمد نور وايي، د پاکستان او هند ترمنځ وروستیو اقداماتو وار دمخه د افغانستان پر سوداګرۍ اغېز کړی او د واګې بندر بندېدل یې د بېلګې په توګه یاد کړي دي.
د بهرنیو چارو وزارت لومړي سیاسي رییس نور احمد نور ویلي: « په کشمیر کې پر سیلانیانو برید شته ترینګلتیا پراخه کړې او له امله یې دواړو هېوادونو داسې اقدامات کړي چې سیمه او په ځانګړي توګه افغانستان ترې اغېزمن دی. د بېلګې په توګه یې د واګه بندر تړل یادولی شو چې امله یې عملا د افغانستان سوداګریز مالونه ایسار پاتې دي. دغه کار د افغانستان سوداګرۍ سکټور ته د پام وړ زیان اړوي.»
د سیاسي چارو شنونکي وايي، که د دغو دوو اټومي طاقتونو ترمنځ جګړه پیل شي، سویلي اسیا به له ستر کړکېچ سره مخ شي او افغانستان چې له دواړو هېوادونو سره اړیکې او سوداګري لري، هم اغېزمنېدای شي.
د سياسي چارو شنونکی معین ګل څمکنی وايي: « که دا جګړه پېښه شي، نو جنوبي آسیا کې به لوی کرکېچ رامنځته شي او افغانستان به یې هم له اغېزو خوندي نه وي؛ ځکه چې موږ له پاکستان سره زیات تجارت لرو، هلته زموږ مهاجرین او خلک دي. همدارنګه له هندوستان سره هم اړیکې او تجارت لرو. بله خبره دا ده چې په سیمه کې به یو جنګي ماحول رامنځته شي او ویلی شو چې دا به لویه ستونزه وي.»
له تېرو څو روځو راهیسې هندي او پاکستاني ځواکونه یو بل ته په مورچو کې ګوته په ماشه ناست دي او د جګړې د پیل لپاره د خپلو مشرانو امر ته انتظار باسي.
که داځل هم د هند او پاکستان ترمنځ جګړه رامنځته شي، دا به د دواړو هېوادونو ترمنځ درېیمه جګړه وي چې له دې وړاندې دوو نورو جګړو کې پاکستان ماتې منلې وه.
