د مزار شریف ښار کفایت څلورلارې څخه تر نوآباد سیمې غځېدلی سړک د ډېرې ګڼې ګوڼې له امله خلک شکایت کوي.
هغه سړک چې د بلخ پر پنځو ولسوالیو سربېره جوزجان، سرپل او فاریاب ولایتونه له مرکز مزار شريف ښار سره نښلوي.
د مراز ښاریان وايي، پر دغه لاره د تګ راتګ پر مهال له ګڼو ستونزو سره مخ وي او باید د پراخولو غم یې وخوړل شي.
د دوی په خبره، که څه هم د یاد سړک لپاره په تېر کې بودیجه منظوره شوې وه د جوړولو کار یې لا نه دی پیل شوی.
د بلخ اوسېدونکی ببرک وايي: « په دې لاره ډېر زیات بیروبار دی او خلک له ستونزو سره مخ دي. له اسلامي امارت غوښتنه کوو چې د دې سړک بل لین هم جوړ کړي.»
د بلخ بل اوسېدونکی سید ایمل وايي: «له دولت غوښتنه کوو چې دا سړک ژر جوړ کړي، له چوک څخه تر کمربند پورې د موټرو ګڼه ګوڼه ډېره زیاته ده.»
د بلخ – جوزجان پر لویه لاره د بلخ ولایت د پنځو ولسوالیو چهاربولک، چمتال، چاهي، دولت آباد او بلخ سربېره د شمال د درېیو ولایتونو جوزجان، سرپل او فاریاب نقلیه وسایط هم تګ راتګ کوي او له امله یې ټرافیکي ګڼه ګوڼه يې هم ډېره شوې ده.
د موټر چلوونکو په خبره، سره له دې چې پر دې لاره ټول موټر چلونکي ډېر احتیاط کوي خو د سړک تنګوالي له امله د ټرافیکي پېښو او ټکر اندېښنې هم ورسره وي.
د بلخ – جوزجان لویې لارې یو تن موټر چلوونکی وايي: « په هغو ځایونو کې سړکونه جوړ شول چې د زورواکو کورونه او جایدادونه په کې وو خو دغه سړک ته پاملرنه نه ده شوې. دا سړک ډېره زیاته ګڼه ګوڼه لري؛ له دولت غوښتنه کوو دا سړک دوه لینه کړي.»
د لارې یو بل موټر چلوونکی بیا وايي: « د ۴۰ دقیقو لاره ده خو ځینې وختونه تر دوه ساعتونو پورې اوږدېږي. ډېر کله ناروغان زموږ په موټر کې ساه ورکوي. که دا لاره دوه سړکه شي، خلکو ته به اسانتیاوې رامنځته شي.»
د بلخ ځايي چارواکي هم د یادې لارې ستونزې مني خو وايي جدي هڅې پيل شوې چې د لارې رغولو کارونه ژر پیل شي.
چارواکي ډاډ ورکوي چې د سړک دویم لاین جوړیدو لپاره بودیجه منظوره شوې او ژر به يې کارونه پيل شي.
د مزار شریف ښاروال محمد کاظم طارق وايي: «هو! د قرآن شریف له چوک څخه ډېر زیات بیروبار وي؛ د پنځو دقیقو لاره تر یوه ساعته اوږدېږي. په دې اړه موږ روان کال چمتوالی نیولی او دا سړک به د آزادۍ پروژې تر چوک پورې د ۱۶ سوه مترو په اوږدو کې دا سړک دوه طرفه کړو او بل لین به ورته ورغول شي.»
د بلخ اوسېدونکي داسې مهال د یادې ترانزیټي لارې د دویم لاين جوړېدو غوښتنه کوي، چې دې وروستیو کې د هېواد ګڼو ولایتونو ترمنځ د عمومي لارو د دویم لاين د جوړیدو چارې پیل شوې دي.
