د بشري حقونو څار سازمان په تازه خپره شوې راپور کې ویلي، له افغان او سوريايي کډوالو سره یې د ترکي ځواکونو د ناوړه او غیر انساني چلن زياتې پېښې ثبت کړې دي.
راپور کې ویل شوي، چې په ترکیې کې دې د ټولو وحشیانه، غیر انساني، له سپکاوي ډک چلن او سزاوو په اړه څېړنې وشي.
راپور کې وړاندې ویل شوي، ترکي ځواکونو افغان او سوريايي کډوال شکنجه کړي او په تاوتريخوالي سره يې له دې هېواد شړلي دي.
د راپور یوه برخه:« له افغان کډوالو سره د ترکي ځواکونو د ناوړه او غیر انساني چلن زياتې پېښې مو ثبت کړې. تمه لرو، چې په ترکیې کې د ټولو وحشیانه، غیرانساني، له سپکاوي ډک چلن او سزاوو په اړه څېړنې وشي. ترکي ځواکونو افغان او سوريايي کډوال شکنجه کړي او په تاوترېخوالي سره یې له دې هېواده شړلې دي.»
په ورته وخت کې سرپرست حکومت هم د افغان کډوالو په اړه د بشري حقونو د څار نړيوال سازمان ادعا تایيدوي او وايي، بار بار یې له اړوند هېوادونو سره د افغان کډوالو د ځورونو په تړاو اندېښني شریکې کړي دي.
چارواکي وايي، سرپرست حکومت هڅه کوي، چې په معقوله توګه بهر ته د تلونکو افغان ځوانانو د تګ مخه ونيسي.
د اسلامي امارت ویاند ذبیح الله مجاهد وايي:« د اسلامي امارت لخوا هم دغه اندېښنه وخت پر وخت له هېوادونو سره شریکه شوې، چې له افغان کډوالو سره په هېوادونو کې بد چلن ونه شي او هغوی اړ هم نه کړی شي، بلکې د هڅونې له لارې، اسلامي امارت هم هڅه کوي چې هغوی( افغان کډوال) خپل هېواد ته راشي او هېوادونه هم باید له دوی سره له نرم چلن کار واخلي. په دې اړه باندې موږ د حکومتونو له استازو سره د خبرو په جریان کې یو او هڅه کوو، چې دې پروسې ته د پای ټکی کېښودل شي.»
د سیاسي چارو کارپوهان ترکیې، پاکستان او ایران ته په اشارې وایي، دې هېوادونو تل د کډوالو په نړيوالو قوانينو کې د افغان کډوالو تعريف شوي حقونه تر پښو لاندې کړي او غیري انساني چلن يې ورسره کړی دی.
دوی له سرپرست حکومته غواړي، چې نور دې په کور دننه خلکو ته د کار زمینه برابره کړي، څو اړ نه شي نورو هېوادونو ته په مرګونو لارو سفر وکړي.
دا په داسې حال کې ده، چې له دې وړاندې هم پاکستان، ایران او ترکیې زرګونه افغان کډوال په زوره د ياد هېواد پرېښودو ته اړ کړي او يا يې هم بېرته کابل ته را ستانه کړي دي.
