د ملګرو ملتونو بشري حقونو عالي شورا په تازه خپاره کړي راپور کې یوځل بیا افغانستان کې د بشري حقونو نقض او د نړيوالو له لوري له اړمنو افغانانو سره د مرستو پر کمښت اندېښنه ښودلې.
په راپور کې د ملګرو ملتونو د بشري حقونو عالي کمېشنر له قوله راغلي، د اسلامي امارت له بیا واکمنېدو راهیسې د ښځو او نجونو پر وړاندې محدودیتونه پراخ شوي او د دې محدودیتونو پلي کولو لپاره ګڼ فرمانونه صادر او قوانین هم وضع شوي دي.
والکر ترک د افغانستان لپاره د ملګرو ملتونو په اړوند ادارو کې د ښځو پر دندو بندیزونو ته په اشارې ویلي، د دې هېواد په ټولو دولتي ادارو کې د ښځو پر دندو او د نجونو پر زدهکړو محدودیتونه زیات شوي دي.
والکر ترک زیاته کړې: « ښځې او نجونې د یوه هېواد راتلونکی دی او پرته له هغوی پرمختګ نه شي کولی. د میلیونونه افغانانو ژوند له هر اړخیزې بېوزلۍ سره مخ دی. تعلیم، کار، کافي خوړو، پاکو اوبو او درملو ته لاسرسی محدود شوی.»
د افغانستان بشري وضعیت ارزونې په اړه په دې خپاره شوي راپور کې ادعا شوې چې په روان زېږدیز کال کې لا هم نږدې ۲۲ میلیون افغانان بشري مرستو ته اړتیا لري.
راپور زیاتوي، د نړیوالو بشري مرستو بې ساری کمښت، له ایران او پاکستان څخه د شاوخوا درې میلیون افغان کډوال اخراج، د اقلیمي بدلون ناوړه اغېزې او په فرضي کرښه له پاکستان سره د نښتو پرمهال د زرګونه کسانو په کور دننه بې ځایه کېدنه هغه لاملونه دي افغانستان کې یې بشري وضعیت یې نور هم سخت کړی.
د ملګرو ملتونو بشري حقونو عالي شورا راپور کې زیاته شوې: « شاوخوا ۲۱.۹ میلیون خلک چې د ټول نفوس نږدې ۴۵ سلنه کېږي، سږکال بشري مرستو ته اړ دي. دا بحران وروسته له هغې رامنځته شوی چې نړیوالې بشرې مرستې کمې شوي، له ګاونډیو هېوادونو ۳ میلیون افغان کډوال و ایستل شول او وچکالیو ادامه پيدا کړه.»
د ملګرو ملتونو بشري حقونو عالي شورا له اسلامي امارت غوښتي چې د ښځو او نجونو پر کار او تعلیم لګولي محدودیتونه لرې کړي.
اسلامي امارت لا د یادې شورا تازه خپاره کړي راپور ته غبرګون نه دی ښودلې، خو له دې وړاندې يې د یاد سازمان او نورو نړیوالو بشري سازمانونو ورته ادعاوې بې اساسه بللې دي.
حکومت تل ټینګار کړی چې ټولو افغانانو ته یې له اسلامي اصولو سره سم حقونه ور کړي دي.
بله خوا، د چارو شنونکي په دې باور دي چې افغانان په تعلیمي او اقتصادي برخه کې هر اړخیزو پرمختګونو ته جدي اړتیا لري او په خبره يې، هېواد له لسیزو راهیسې سختو جګړو او ناخوالو ځپلی او خلک د ژوند له بنسټیزو اړتیاوو بې برخې دي.
د سیاسي چارو شنونکی اخترمحمد راسخ وايي: « افغانستان نیمه پېړۍ په جګړو کې مزل وهلی او دا مهال له سختو اقتصادي ستونزو سره مخ دی. که نړیوال منځګړیتوب وکړي، له پاکستان سره جګړه ودرول شي او افغانانو ته کاري فرصتونه برابر شي، زه باور لرم چې له دې اقتصادي بحران به هم ووځي.
