د اقتصادي همکاریو سازمان(ایکو) څلورمه دوه ورځنۍ ناسته د ایران په کوربه توب پای ته ورسېده.
دغه ناسته د لسو غړیو او دوو مېلمه هېوادونو(عمان او عراق) د کورنیو چارو وزیرانو او مرستیالانو په ګډون دوشنبه پیل شوې وه او د یوې ګډې اعلامیې په لاسلیکولو سره د سې شنبې په ورځ پای ته ورسېده.
د هېوادونو استازو په کې د غړیو هېوادونو ترمنځ د ګډو پولو امنیت پر ټينګولو، اقتصادي همکاریو او د کډوالۍ بهير پر مدیریت بحثونه کړي.
د یوې ایراني رسنۍ په راپور کې راغلي: « د ګډو پولو امنیت او د امنیتي ګواښونو پر وړاندې مبارزه، د نشه يي توکو قاچاق مخنیوی، د غړیو هېوادونو له لوري سوداګرو او ټرانزیټ لپاره د اسانتیاوو رامنځته کول، د کډوالۍ مدیریت او په سیمهيیزه کچه د اقتصادي همکاریو پراخول هغه موارد دي چې د ايکو سازمان غړیو هېوادونو استازو له خوا پرې هوکړه وشوه.»
بله خوا، د دې ناستې په څنډه کې د اسلامي امارت د کورنيو چارو وزارت امنيتي معين د ترکيې له چارواکو سره د کابل او انقرې پر شريکو مسايلو خبرې کړې.
حکومت په ایکو سازمان کې د افغانستان غړیتوب له ګاونډيو او د سیمې له هېوادونو سره د اقتصادي همکاریو په پیاوړي کولو کې مهم بولي.
د اقتصاد وزارت مسلکي معین عبدالطیف نظري وايي: « د ایکو اقتصادي همکاریو سازمان د غونډې تر ټولو مهمه پایله دا ده چې د غړیو هېوادونو ترمنځ به اقتصادي همکارۍ زیاتېږي، علمي، ښوونیزې او فرهنګي همکارۍ به پراخېږي، همدارنګه صنعتي، ټرانزیټي او تجارتي اړیکې به پراخېږي. د غړیو هېوادونو ترمنځ دا ناسته کولی شي افغانستان ته هم په لنډمهاله او اوږدمهاله کې ګټه ورسوي.»
د ایکو سازمان ناستې موخه، د غړیو هېوادونو له خوا د ګډو اقتصادي همکاریو پراختیا، ټرانزیټي اسانتیاوو رامنځته کول، د ګډو پولو امنیت ساتنه او د تعلیمي او فرهنګي همکاریو زیاتول وو.
د اقتصادي چارو شنونکی محمد یونس ځدراڼ وايي: « په دې غونډه کې د صادراتو او وارداتو په نرخو کې د اسانتیاوو په راوستلو بحثونه کېږي، ترڅو ښکېلو هېوادونو ته یې ګټه ورسېږي. افغانستان ته هم د دهلېزونو په برخه کې چې کولی شي د منځنۍ اسیا او خلیج هېوادونه سره وصل کړي، ډېره ګټه رسېږي.»
د ايکو سازمان له ناستې ورهاخوا، د ايران حکومت ويلي چې د بهرنيو چارو وزارت مرستيال يې په کابل کې د اسلامي امارت له چارواکو سره د پولې پر امنیت، حقابې، قضايي همکاریو او نورو هغو مسايلو په اړه خبرې کړې دي چې د کابل او تهران ترمنځ په اړيکو کې مهم دي.
د ایران بهرنیو چارو وزارت ویاند اسماعیل بقايي ویلي: « کابل ته د کاظم غریب آبادي سفر موخه دا وه چې د ایران او افغانستان ترمنځ د اړیکو په اجنډا کې پاتې یو شمېر مسایل وڅېړل شي. په دې خبرو کې د پولې امنیت، د اوبو حقوق او قضايي همکاري شامل دي چې له افغان چارواکو سره پرې خبرې شوې دي.»
په حقوقي چارو کې د ايران بهرنيو چارو وزارت مرستيال کاظم غريب آبادي د يکشنبې په ورځ کابل ته راغلی و او د افغانستان له چارواکو سره يې د دوه اړخيزو همکاريو پر زياتولو بحثونو او ژمنې وکړې.
