د ایران او اسراییلو ترمنځ د جګړې په دوام، له ایرانه د افغان کډوالو د راستنېدو لړۍ چټکه شوې.
د هرات اسلام کلا بندر مسوولین وايي، د يادې جګړې له وېرې په ورځنۍ توګه له ۸ تر ۱۰ زرو افغانان د دوغارون او اسلام کلا بندرونو له لارې بېرته خپل هېواد ته راستنېږي او په دې توګه له ایرانه د راستنېدونکو افغانانو شمېر د تېر پرتله له ۵۰ تر ۶۰ سلنو زيات شوی.
په اسلام کلا بندر کې د کډوالو او سرحدي چارو آمريت مرستيال عبدالظاهر رحماني وايي: ›› ایران کې د نا امنیو او تهدیداتو له زیاتوالي سره هېواد ته د کډوالو راتګ زیات شوی او په ورځني ډول له ۸ تر ۱۰ زرو افغان کډوال راځي. دا د پاسپورټونو او قانوني وېزو درلودونکو پرته غیر قانوني کډوال راستنېږي. د دوی له منځه ویلای شو چې ۴ تر ۵ زره یې کورنۍ دي.»
په همدې حال له ایرانه یو شمېر راستانه شوي افغانان هېواد ته پر راتګ خوشحال دي، خو یو شمېر نور بیا د ایراني ځواکونو له خوا د ورسره شوي زور زياتي له امله شکایت کوي.
دوی وایي، د ایراني ځواکونو له خوا وهل شوي او نه دي بریالي شوي چې خپلې شتمنۍ له ځان سره هېواد ته راوړي او دغه راز بانکي حسابونه یې تړل شوي دي.
له ایران راستون شوی سید عبدالاحد وايي:« هلته جګړه ده خلک نه پوهېږي څه وکړي؟ دوه یا درې کسان یو ځای کېږي موټر دربست کوي او سرحد ته راځي، خو له سرحد بېرته ګرځول کېږي او ورته وایي، لاړ شئ هر ولایت کې چې اوسېدلی، له هغه ځایه د ملي بس ټکټ واخلئ. بغییر له دې تاسو د تروریست په بهانه نیسي او پنډغالو ته مو انتقالوي.»
له ایرانه یو بل راستون شوی کډوال زرین خان وايي:›› موږ ته یې هیڅ را نه کړل، کور مو هلته موټر مو هلته پاتې شول. ورته ومو ویل کارت لرو، ویل نه باید لاړ شئ موږ یې را وشړلو و مې ویل ۶۰۰ میلیونه تومن مې پر کور ورکړي ویل نه باید لاړشئ موږ یې خالي لاس راولیږلو.»
د یونس په نوم راستون شوی کډوال وايي: « موږ له تهران ډېر شکایت لرو. هر نفر به ۱۰ میلیونه رابار کړو زموږ ۱۰ میلیونه یې واخیستل او موږ یې راوړولو د سمنان اردوګاه ته. هلته یې ۲ میلیونه راڅخه واخیستل یوه اوونۍ یې وځنډولو، بیا یې یو نیم میلیون تومانه را څخه واخیستل او د سنګ سفېد پنډغالي ته یې را انتقال کړلو.»
له ایران راستنه شوې پشتون امامي وايي: « د ایران ډېر ښه خلک وو، ما ۱۵ کاله هلته تېر کړل. له موږ سره یې ډېر ښه وکړل، خو اوس چې جنګ شو، موږ یې را وشړلو.»
د چارواکو په خبره، له دې وړاندې هره ورځ شاوخوا ۴ تر ۵ زره کسان د دوغارون له لارې هېواد ته داخلېدل، خو اوس د ایران او اسراییلو د جګړې له امله دغه شمېر شاوخوا ۵۰ تر ۶۰ سلنه زیات شوی دی.
