د اسراییلو له لوري پر ایران د بریدونو له پیل کېدو وروسته، افغانستان ته د ایران د نفتو او ګازو صادرات بند شوي.
هرات کې د نفتو او ګازو شرکتونو مسوولین وایي، له ایران د نفتو او ګازو وارداتو بندېدو سره د هر ټن نفتو بیه تر ۱۰۰ ډالرو پورې لوړه شوې ده.
هرات کې د نفتو او ګازو دولتي شرکت تجارتي آمر صدیق الله منصور وايي: « د ایران او اسراییلو ترمنځ جګړه سبب شوې چې له ایران د فراه، نیمروز او هرات ولایتونو له بنادرو کېدونکي واردات مطلق بندي شوي دي. موږ له اسلام کلا بندر تر ۲۰۰۰ ټنو ورځني واردات لرل، خو اوس دا کچه صفر شوې ده.»
په ورته مهال، د نفتو او ګازو یو شمېر پلورونکي هم مني چې ایران کې د جګړې له امله د نفتو او ګازو په بیو کې توپير راغلی.
د دوی په خبره، د یو لیټر تېلو بیه له ۶۰ افغانیو ۶۷ ته او د یو کیلو اوبلن ګازو بیه له ۴۸ افغانیو۶۰ ته لوړه شوې ده.
د نفتي توکو پلورونکی نوید احمدي وايي: « د نرخونو د لوړېدو اصلي لامل د ایران او اسراییلو ترمنځ جګړه ده، په بازار کې تېل ډېر کم شوي او له امله یې په هر لېټر کې تر پنځو افغانیو بیې لوړې شوې دي.»
د ګازو پلورونکی فېزور احمد امیني وايي: « کله چې پر ایران د اسراییلو له خوا برید پيل شو، له افغانستان سره د ایران پولې وتړل شوې او له امله یې د ګازو بیې لوړې شوې. اوس د یوه کیلو ګازو بیه له ۶۰ تر ۶۲ افغانیو ده.»
په همدې حال کې د هرات اوسېدونکي بیا له مسوولینوغواړي چې د بیو کنټرول او له منځنۍ آسیا د نفتو وارداتو لپاره ګامونه پورته کړي.
د هرات اوسېدونکی جمشېد وايي: « شرایط ښه نه دي، خلک بېکاره دي او که پولې خلاصې شي او تېل راشي، همدارنګه نظارت وشي، دا د خلکو پر ګټه دي.»
د هرات یو بل اوسېدونکی وايي: « له دې وړاندې مو یو کیلو ګاز په ۴۸ افغانیو اخیسته، خو نن له ۶۳ تر ۶۵ افغانیو پورل کېږي. له مسوولینو غوښتنه کوو چې پولې خلاصې کړي او قېمتونه بېرته راټیټ کړي.»
دا په داسي حال کې ده چې له ایرانه د نفتي توکو د وارداتو له بندېدو سره هم مهاله، د تورغونډۍ بندر له لارې د منځنۍ آسیا له هېوادونو په ورځني ډول د نفتو وارداتو کچه له ۵۵۰ ټنو څخه ۱۲۰۰ ټنه ته لوړه شوې ده.
له ایران څخه افغانستان ته د نفتو او ګازو واردات د نیمروز ولایت له بندر، د فراه له میل ۷۸ بندر او د هرات ولایت اسلام کلا بندر له لارې ترسره کیږي.
