د څارنې او څېړنې یوه بنسټ په یوې تحلیلي مقاله کې ویلي، د چابهار بندر له سټراټیژیک موقعیت سربېره، د افغانستان، هند او ایران د اقتصادي ودې او ثبات لپاره حیاتي ارزښت لري.
د مقالې لیکوال د امریکا او ایران جګړه او پر تهران د واشنګټن اقتصادي بندیزونه او محدودیتونه هغه لاملونه یاد کړي چې کولی شي د دې بندر له لارې افغانستان او هند له ترلاسه کېدونکو اقتصادي ګټو بې برخې او زیانمن کړي.
په دې څېړنیزه مقاله کې ادعا شوې چې اوسمهال په جیوپولټیکو بدلونونو کې کلابند شوی دغه بندر له یوه ناڅرګند وضعیت سره مخ شوی.
د سیاسي چارو شنونکی عزیز معارج وايي: « د امریکا او ایران په جګړه کې ایران نه غواړو د خپلو ګټو پر بنسټ چابهار بندر ته ستونزې جوړې کړي، همدارنګه زه فکر کوم امریکا هم د افغانستان او هند لپاره په دې بندر کې د خنډ جوړولو نیت نه لري. په اوسني حالت کې څه نا څه ډار شته او کېدای شي له فعالیت څخه لوېدلی وي، خو په ټوله کې بېرته احیا کېږي او فعالیت به کوي.»
د دې تحلیلي ارزونې په یوه برخه کې راغلي، له هغې وروسته چابهار بندر افغانستان ته د یوه مهم بندر په توګه حساب شو چې په تدریجي ډول یې له دې لارې واردات او صادرات زیات شول او د پاکستان له لارو پر سوداګرۍ تکیه راکمه شوه.
شنونکي وايي، چابهار سوېلي اسیا له منځنۍ اسیا سره تړي او افغانستان ته ترې د میلیاردونو ډالرو واردات او صادرات کېږي. د دوی په خبره، پر دې بندر هر ډول وضعیت به د افغانستان اقتصادي وضعیت او ثبات هم اغېزمن کړي.
د اقتصادي چارو شنونکی وايي: « چابهار د افغانستان د وارداتو، صادراتو او ټرانزیټ لپاره تر ټولو ښه انتخاب دی.»
د څارنې او څېړنې یاد بنسټ په دې تحلیلي مقاله کې افغانستان ته د چابهار له لارې د اوسنيو صادراتو او وارداتو کچه نه ده یاده شوې، خو په ۲۰۲۴ کې زېږدیز کال له دې بندر څخه د صادراتو عمومي ارزښت ۱۲۷ میلیون ډالر او وارداتو کچه ۲.۵ میلیارد ډالر ګڼل شوې ده.
