د امریکا متحده ایالتو کانګرس له افغانستانه د امریکايي ځواکونو اېستلو څېړلو لپاره ۱۶ کسیز کمیسیون جوړ کړی دی او دغه کمېسیون ته یې څلور کلونه وخت ورکړی،چې خپلې ټولې څیړنې بشپړې کړي.
انګرس وايي:« د کانګرس له لوري د دغه کمېسیون ۱۶ ټاکل شوي غړي به څلور کاله وخت ولري،چې د ۲۰۰۱ کال له جون میاشتې د ۲۰۲۱ تر اګسټ میاشتې پورې د امریکا او د هغوی د متحدینو نظامي، استخباراتي او ډيپلوماټیک فعالیتونه وڅېړي. دوی به له افغانستانه د امریکايي ځواکونو وتل او د تلفاتو په اړه هم څېړنه وکړي.»
که څه هم د سیاسي چارو یو شمېر شنونکي دا کار اوس ناوخته بولي خو وايي، یوازینۍ موخه یې ښايي له افغان شل کلنې جګړې د امریکا او ناټو درس اخېستل وي او دا هغه دریځ دی،چې څو ځله پرې دواړو لورو ټینګار هم کړی دی.
د سیاسي چاررو شنونکی طارق فرهادي وايي:«که دا کمېسیون تر ګوندونو پورته موضوع وي او د ګوندونو پورې تړلې نه اوسي، نو تر ډېره یې موخه د درس اخېستل دي،چې په افغانستان کې یې څه زده کړي دي. خو د امریکايي ځواکونو وتل له افغانستانه دا ډېره ژوره موضوع ده،ځکه هغوی یوازې افغانستان نه بلکې ټوله سیمه پریښې ده.»
اخوا ځیني نور بیا وايي، د امریکامتحد ایالت خپل ولس او نړیوال په دې قانع کول غواړي، چې له افغانستانه وتل د دوی سیاسي او پوځي بریا وه.
د سیاسي چارو شنونکی جاوید مومند وايي:« د دې لپاره چې دوی بېرته د نړیوالو ذهنیتونه راواړوي، او نړۍ ته و وايي،چې دوی په افغانستان کې خپلې موخې ته رسیدلي او څه چې یې غوښتل،هغه یې ترلاسه کړي دي. ان دا تحلیلونه هم دي،چې امریکا ټوله پړه پر تیرو چاروکو واچوي.»
خو د راپورونو پر بنسټ د دغه کمېسیون په جوړیدو کې د افغانانو د ملکي تلفاتو په اړه هېڅ ذکر نه دی شوی او د افغانستان لپاره به د دا ډول کمیټو جوړیدل کومه ځانګړې ګټه ونه کړي.
