د امریکا پوځ مرکزي قوماندانۍ ویلي، له افغانستانه یې د سرتېرو او وسایلو د اېستلو لړۍ ۹۵ سلنه بشپړه شوې ده.
د یادې قوماندانۍ له لوري په خپره شوې خبرپاڼه کې ویل شوي،چې تر اوسه پورې یې خپل اوه مرکزونه افغانانو ته سپارلي، چې په کې د بګرام او کندهار لویې پوځي اډې هم شاملې دي.
خبرپاڼه کې دغه راز لیکل شوي، د جولاۍ تر دولسمې نېټې پورې د سي ۱۷ ډوله الوتکو د ۹۸۴ بار معادل وسایل او مهمات له افغانستانه اېستل شوي او څه باندې ۱۷ زره وسایل د دفاع لوژیستک ایجنسۍ ته سپارل شوي،چې ویجاړ یې کړي.
افغانستان کې د بهرنیو ځواکونو عمومي قوماندان جنرال سکاټ میلر د ځواکونو قومنده د امریکا د پوځ د مرکزي قوماندې مشر فرانګ مک کنزي ته سپارل شوې.
د امریکا ولسمشر جو بایډن د پرېکړې له مخې، ټاکل شوې ده،چې د سپټمبر میاشتې تر ۱۱مې ټول بهرني ځواکونه له افغانستانه ووځي.
