له افغانستانه د امریکایي ځواکونو وتلو په اړه د ډونالډ ټرمپ د نیوکو په دوام، نوموړي یو ځل بیا پر دې پرېکړې داسې مهال نیوکه کړې چې امریکايي ځواکونو تاازه پر وېنزوېلا برید کړی او د دې هېواد ولسمشر او مېرمن یې نیولي دي.
د امريکا متحده ايالاتو ولسمشر ډونالډ ټرمپ چې د وېنزوېلا د ولسمشر نیولو په اړه یې خبرې کولې، له افغانستانه د امريکايي ځواکونو د وتلو پرېکړه یې د تمسخر وړ او د بایډن ادارې ناکامي بللې.
ډونالډ ټرمپ ویلي: « د نن په څېر ډېر کم داسې وخت وینی، کنه ډېر وخت زموږ پوځي بریدونه او حملې ناکامې شوې دي. دا هغه څه دي چې تاسو ټولو لیدلي چې ښه پایله یې نه درلوده او شرموونکي وو. هغه که د افغانستان حالت و او یا د جيمي کارټر وختونه وو.»
د سیاسي او نظامي چارو یو شمېر شنونکي بیا د ټرمپ دا ډول څرګندونې په نړیواله کچه د امریکا د ناکامو او دېکتاتورانه سیاستونو دوام بولي. دوی ټینګار کوي چې امریکایي چارواکي دې د زور په ځای د تعامل او مذاکراتو پالیسي خپله کړي.
د نظامي چارو شنونکی اخترمحمد راسخ وايي: « د ټرمپ فکر، وړاندیزونه او نظریات دېکتاتورانه دي او سیمه ییز هېوادونه یې ناامنه کړي. ګاونډیانو ته زموږ هېواد په کورنیو او بهرنیو چارو کې مداخلې ته د لاسوهنې لاره هم همدې غربیانو هواره کړې ده.»
د سیاسي چارو شنونکی زلمی افغانیار وايي: « د دې په ځای چې دوی بیا په افغانستان کې د نظامي حضور خوبونه وویني، د ملي ګټو پر بنسټ د تعامل په اړه دې خبرې وکړي؛ ځکه چې د سیاسي او اقتصادي ثبات لرونکی افغانستان د نړیوال امنیت په تأمین کې ښه رول لوبولی شي.»
له افغانستانه د امریکایي ځواکونو د وتلو پر څرنګوالي دا نیوکې په داسې حال کې دي چې له دې وړاندې هم څو ځلې د امريکا اوسني ولسمشر د جوبايډن اداره د هغه څه په اړه چې د نوموړي په خبره له بریاليو پوځي عملیاتو وروسته، سیاسي ناکامي ګڼل کېږي؛ سختې نېوکې کړې دي.
