د امریکا دفاع وزارت یا پېنټاګون یو ځل بیا له افغانستانه د امریکایي ځواکونو د وتلو پروسې په تړاو د پراخو څېړنو ترسره خبر ورکړی.
رویټرز خبري اژانس لیکلي، د امریکا دفاع وزیر پیټ هېګزېټ له اړوند ارګانونو غوښتي چې له افغانستانه د امریکایي ځواکونو د وتلو او تخليې پروسه له سره په پراخه او جدي ډول وڅېړي.
هغه د تخليې عملياتو پرمهال د کابل پر هوایي ډګر د هغه بريد په څېړلو کې د جديت او دقت سپارښتنه هم کړې چې په کې ۱۳ امریکایي ځواکونه او څه باندې ۱۵۰ افغانان ووژل شول.
د امریکا دفاع وزیر زیاته کړې:« موږ باید هغه څه په پراخه کچه او له دقت سره مل وڅېړو. هغه څه چې په افغانستان کې د ۲۰۲۱ کال په اګسټ کې پېښ شول. دا هغه غیر منظمه پېښه او له افغانستانه د امریکايي ځواکونو وتل و چې ۱۳ امریکایي وګړي په کې ووژل شول او څه باندې د ۱۵۰ افغانانو ژوند یې واخیست. موږ باید له هغوی پوښتنې ګرویږنې وکړو چې په دې غیرمنظمې پېښې کې ښکېل وو.»
د امریکا دفاع وزیر همدارنګه د جوبایډن پر ادارې هم نیوکې کړې چې له افغانستانه یې د امریکایي ځواکونو داسې بې پلانه او بې فکره وتل پیل کړل چې له امله یې ګڼو خلکو قرباني ورکړه.
بله خوا، د چارو څارونکي وایي امریکایي لوري لاهم له افغانستانه د ځواکونو د وتلو په پروسه کې د خپلو ولسي خلکو له سختو فشارونو سره مخ دی.
د سیاسي شنونکی شهسوار سنګروال وايي: « یوه ډېره مهمه خبره دا ده چې د امریکا ولس او په ځانګړې توګه د وژل شویو سرتېرو کورنۍ، یا هغوی چې مرګ ژوبله ور اوښتې، همدارنګه سیاسي فشارونه سبب شوي چې ټرامپ بار بار ادعا وکړي چې باګرام هوايي اډه یې نه پرېښوده، ځکه دا اډه ډېر ستراتیژیک او سوق الجیشي ارزښت لري.»
د امریکا دفاع وزیر دوه ورځې وړاندې له فاکس نیوز سره په یوې ځانګړې مرکه کې هم ویلي و چې له افغانستانه د امریکایي ځواکونو د وتلو پروسه یې له سره څېړلې او ډېر ژر به یې پایلې له خپلو خلکو سره شریکې شي.
د ۲۰۲۱ کال د اګست د ۳۰مې په نیمه شپه الوتکې ته د وروستي امریکايي پوځي په ختلو سره افغانستان کې د ناټو او امریکايي ځواکونو ۲۰ کلن حضور پای ته روسېد.
له افغانستانه د امریکايي ځواکونو د وتلو ناندریځ بهیر ګډوډ او خونړی و چې له امله یې تر اوسه په امريکا کې دننه د جوبایډن پر حکومت سختې نیوکې کېږي.
د سیاسي چارو شنونکی خلیل احمد نادم وايي: « د امریکايي ځواکونو د وتلو مساله یوازې یوه سیاسي او تبلیغاتي مساله ګرځېدلې او ټرمپ په ټاکنیز کمپاین کې ترې کار واخیست او پر بایډن یې ملامتي اچوله چې ولې له افغانستانه په دې ډول ووت.»
د نږدې۲۰ کلن ماموریت له پای ته رسېدو وړاندې د ۲۰۲۰ کال د فبرورۍ په ۲۹مه په دوحه کې د امریکا او طالبانو ترمنځ هوکړه وشوه.
د همدې هوکړې له مخې ټولو بهرنيو ځواکونو له افغانستانه کرار کرار وتل پیل کړل. خو د دوی او په ځانګړې توګه د امریکايي ځواکونو د وتلو بڼه له ګډوډۍ او بې نظمۍ سره مخ وه.
