د امریکا او طالبانو د هوکړو له نهايي وروسته بین الافغاني مذاکرات کېږي.
طالبانو له افغان حکومت سره په چورلټ ډول د سولې خبرې رد کړي دي او امریکا سره هم د خبرو وروستۍ پایله نه ده مالومه خو ممکن د اګست په ۱۴ مه مالومه شي چې دواړو لورو د اووه پړاوه خبرو نتیجه څه ده.
د سولې په چارو کې د دولت وزیر عبدالسلام رحیمي وایي حکومت به په دوو اونیو کې طالبانو سره خبرې پیل کړي.
له دې داسې ښکاري چې د امریکا او طالبانو خبرې دومره نږدې شوي چې اوس باید د طآلب او حکومت په ستونزه خبرې پیل شي.
په سولې چارو کې د دولت وزیر سلام رحیمي داسې وايي (( د سولې په پروسه کې ټولو ښکیلو خواوو سره د مذاکراتو لپاره د پلاوي په ټاکلو کار روان دی او ټاکل شوې لومړنۍ ناسته د اروپا په یو هېواد کې ترسره شي.))
خو د افغان حکومت دې خبرو ته د افغان سولې لپاره د امریکا استازي غبرګون ښوولی او په ښکاره ټکو یې ویلي دي چې د افغان حکومت او طالبانو مزاکرات له توافق وروسته امکان لري.
د افغان سولې لپاره د امریکا ځانګړی استازی زلمی خلیلزاد داسې وايي ((د بین الافغاني خبرو په اړه په کابل کې ډېرې اوازې دي؛ د دې لپاره چې خبر واضح شي، بین الافغاني مذاکرات به هغه مهال وشي، کله چې موږ او طالبان خپلې هوکړې نهايي کړو.))
په قطر کې د طآلبانو د دفتر ویاند لیکلي چې افغان حکومت سره به د نورو سیاسي جریانونو په توګه کیني.
قطر کې د طالبانو د سیاسي دفتر ویاند سهیل شاهین داسې ویلي ((د بهرنیو پوځیانو د وتلو د مهالوېش له اعلان وروسته به د ټولو سیاسي جهتونو له مشترک مذاکراتي ټیم سره بین الافغاني مذاکرات پيلېږي. د کابل اداره (افغان حکومت) به د حکومت په حیث نه، بلکي د نورو سیاسي جهتونه په څېر یو جهت وي.))
مخیکنی ولسمشر حامد کرزی چې د بین الافغاني ناستو لوی برخوال دی ویلي د سولې بریا باید یقیني شي.
مخکېنی ولسمشر حامد کرزی داسې وايي ((طالبانو سره د سولې پخوانۍ خبرې په افغانستان کې د تلپاتې سولې او ټیکاو لپاره له مهمو ګامونو څخه دي. سوله یو ملي بهیر دی؛ افغان حکومت او ټول افغانان باید په ګډه کار وکړي چې بریا یې یقیني کړي.))
د ولسمشریزو ټاکنو نوماندانو هم د ټاکنیزو کمپاینونو پرمهال سوله د خپلو ستراتیژیو په سر کې یاده کړې ده.
خو باور نه کېږي چې افغان حکومت دې له ټاکنو وړاندې طآلبانو سره خبرو ته ورسیږي.
